Sam 62:2-11

²Nide butqbr nyznge x mevalu rnge. Nide lrpalvc nyznge kx tu-amqngio-ngrne.

³Delc nimu kxdrka'-ngrng bzkq tz-zvzpeamu ninge mzli ka trxplrpewxu. X bzkq apusr-ngrnamu ninge nzawxo-krmu ma kx blzlongr.

⁴Ryrlqamu drtwr ngr nzapotxo-krmamu ninge me matq kc tqmnco-ngrmc. X abrtzlvzamu nzpokiatitr-krmu ninge. Murde nivz lr naomu prlxmamu bange, A' mz nabzmu la, ngyati drtwrmu ninge.

⁵Gct txpwz kx mnc-xgle-zvzx mz nabznge, Murde nzmnc-zpwx-krnge vzpxm bade.

⁶Nide butqbr nyznge kx abrkitrx drtwrnge. Nide lrpalvc nyznge kx tu-amqngio-zvz-ngrne.

⁷Nzarlapx-krnge x nzmrlue-krnge yctr txpwz bade, Mz nzngini-krde butqbr nyznge kxmqngi kx rlakitrx.

⁸Leplz nengeng, mz nzangidati-krbzle da kx yc mz drtwrmu, na-abrtxtrpwzmu drtwrmu bade. Murde nide txpwz me rlakitrku.

⁹A' bzkq brti drtwrmu leplz, murde nigu amrlx apu-txpwzku zsikapu, Kxmule-esz' nigu kxnzetung o leplz txneng. Murde nzmu na-arsakrlrku nzmrlekr Gct x nigu, Nide kx mrle txpwz, a' nginigu da-nrbalq.

¹⁰X mz nzrtwz-krmu da kx suti drtwrmu, bzkq brti drtwrmu nzamwxlr-krmu leplz x nzpna-krmu dztudrng. X kxmule-esz' nimu bcnyrng, bzkq abrtrpzmu drtwrmu mz trau scmu.

¹¹A' na-amqtrku drtwrgu mz nzxlr-krgu natq lcng. Murde Gct txpwz kc tqmatq.