Sam 60:2-9

²Agoi, si va niu ia sa pepeso, meke ta viqala si asa. Mu salaṉi Goi sari na Mua tie pu ele ta huara guana pepeso.

³Ele vata sigiti i Goi sari na Mua tie koari na tiṉitoṉa tasunadi, ele guana va naponi gami vaeni Goi, ke viviri si gami meke ene tedeve lamae.

⁴Ele va balaui Goi sarini pu pamaṉa nigo, pude di va talevara koasa tinahuara.

⁵Mu harupu gami pa Mua ṉiniraṉira, Mamu olaṉia sa mami vinaravara, gami pu tataru nigo, pude tava mataqara si gami pa Mua ṉiniraṉira.

⁶Ele zama sa Tamasa pa Nana vasina hopena, “Pa korapa minataqara si kaqu paqapaqaha si pa vasileana Sekemi, meke kaqu paqahia rau sa Lolomo pa Sukoti koari na Qua tie.

⁷Taqarau sa popoa Qileadi, Taqarau tugo sa butubutu Manase. Sa butubutu Iparemi si na butubutu tadi na tie varipera, meke sa butubutu Ziuda si tadi na baṉara.

⁸Moabi si kote guni nia Rau Qua besini pezapezakuana koasa popoa. Pa Edomu si kaqu gona la nia Rau sa Qua sadolo, pude na vina gilagilana sapu Taqarau si asa. Koari na tie Pilisitia si kaqu velavela la nia Rau sa Qua minataqara.”

⁹Kei Tamasa, esei si kaqu turaṉa gami pude la nuquria gami sa vasileana lavata ta barana? Esei si kaqu turaṉa lani gami pa Edomu?