Sam 5:3-12

³Kxetu, mz nourla kang kqlu natqnge sa navzbz bam. X nakrka'-zvzbo bam, mz nzaenzli-krbo natqm kxmrlz.

⁴Yawe, trnginipqu Gct kx abrtzlvzle da kxtrka. X trmnc-lxblrwamuu mz kxdrka'-ngrng.

⁵Leplz kx nzglqpx-lzbqng trtxpnzngr nzmnctr-krbzlr bam, Murde rblxbz mz leplz kx mrlz-zvzbz badr nzale-krdr alwx nztutr-krbzlr mz mzpq.

⁶Odatiq kxnzpokiang, X obqszo-zvzq kxnzrnibqng x kxnzesabrting.

⁷A' mz nzaodu-zvz-krm, delc navztr-ngrne Mangr-nzangiongr nim, X nayrngzobo mz nzamatqngr nim.

⁸Yawe, mailz ninge mz nqmq krm kxtubq, murde enqmi rnge nzkqlu-zlwzng. X aelwa-zpwx-ngrm bange me pnz drtwrm.

⁹Da angidr trvzpxpuu mz nao enqmi rngeng. Murde mz nabzdr la nzodatingr txpwz. X mz nzycmne-krdr nzmailzlr leplz Mz nzbatr-krbzlr nzbz-krdr esz'-krdr.

¹⁰Gct, plzpx alwx ngrdr x ayrplapx nidr, Mz nzprtz-mou-krdr mz trtxki scdr. Mapulrpxngr nidr mz nzkqlukr alwx ngrdrng, Murde nzpxtxpx-zvz-ngrdr nim.

¹¹A' leplz amrlx kcng tzabrtrpzlr drtwrdr bam na-abrtzng. X nangr-along mz nzelalz-krm drtwrdr. Aclve-angidr kxnzmrlztilr nim Murde nabilvzlr nim.

¹²Yawe, amrlz-zvzq kxnztubqng. X nivz lrm o-ngalelvzle nidr Mz nzapu-krde temz ngr lomrdr kc tqyrputrngr nipna.