Sam 59:2-17

²Va sare au koarini pu tavete va kaleana, Mu harupu va seu au koari na tie variva mate sara.

³Ura dotu, korapa pequ aqa nau rini si rau, sari na tie kaleadi si varigara pude varipera mae koa rau. Kei Zihova, lopu tavete gua asa sina lopu seke tinarae na sea si rau.

⁴Loke qua sinea si rau sapu pada pude varigara mae pequ nau rini. Mu tuturei mae dogorau, Mamu toka nau!

⁵Zihova Tadi na Qeto Minate, Agoi mo sa Tamasa tadi na tie Izireli. Mu tuturei mae, Mamu va kilasi sari na butubutu huporodi; lopu veko hola ia keke koari na tie kaleadi pu tavetavete va kaleana.

⁶Doduru veluvelu si pule mae si arini, kurumu variva nuli guana siki, meke ene vari likohae nia rini sa vasileana nomana.

⁷Avoso latu sari na dia zinama ṉoṉovala, na vina matagutu. Sari na dia zinama pa ṉuzudi si ṉaru guana magu varipera. Balabala ia rini sapu lopu kaqu ta avoso pa tie, gua.

⁸Ba hegere ni Goi Zihova si arini, meke va sisire ni Goi sari doduru butubutu huporo.

⁹Kei Tamasa, raṉea rau sa Mua ṉiniraṉira, Agoi mo sa qua Aqoroana.

¹⁰Koasa Nana tataru nabuna si kaqu mae harupau sa qua Tamasa, meke kaqu va dogoro nau Sa sapu va kilasi Sa sari na qua kana.

¹¹Kei Baṉara, mami lave, Mu lopu tuturei va matei sari na kana hire, ba Mamu vata hurakatae i gedi pa doduru vasina pude di kilasa, pude madi lopu muliṉi nia rina qua tinoni sa Mua ṉiniraṉira.

¹²Tale kaleadi mo si zama vura ni rini pa ṉuzudi na berudi. Madi ta sipata gedi koari na dia vinahesi pule teledia, sina leveleve na kokoha si arini!

¹³Mu va puzuli pa Mua binugoro, Mu va puzulu hokari gedi pude madi gilania ri doduru tie sapu Tamasa si koa totoli pa Izireli, meke sa Nana tinolie si repaha la pa doduru kasia popoa.

¹⁴Hopeke veluvelu si pule mae si arini, mae variva nuli guana siki si arini. Ene viṉohae ia rini sa vasileana nomana,

¹⁵guana siki sapu hata ginani, hohou si arini be lopu deṉa.

¹⁶Ba arau si kaqu kera nia sa Mua ṉiniraṉira, pana munumunu kaqu kera va ululae nia rau sa Mua tataru nabuna. Ura Agoi mo sa qua Aqoroana, meke na qua tinokae pa totoso tasuna.

¹⁷Kei Tamasa, vahesi Igo rau si Goi, raṉea rau sa Mua ṉiniraṉira. Agoi mo sa qua Aqoroana, sapu va dogoro nau sa tataru nabuna.