Text copied!
CopyCompare
Buka Hope - Sam - Sam 57

Sam 57:1-11

Help us?
Click on verse(s) to share them!
1(Keke vinaravara te Devita sipu govete nia sa se Saula koasa bae.) Mu taleoso nau pa Mua tataru, Kei Tamasa, Mu taleoso nau. Ura koa Goi mo si aqorae si rau kekeṉoṉo guana kurukuru pu va aqori sari na tuna pa kauru tatapuruna si gua tugo sapu aqorae si rau koa Goi, osolae hola sa tinasuna pa tinoa.
2Tepa la si rau koasa Tamasa pu Ululu Hola koari doduru, koasa Tamasa pu va gorevura i sari doduru qua hiniva.
3Kaqu olaṉa mae si Asa pa Maṉauru pude harupau. Kaqu va kilasi Sa sarini pu kukiti nau. Kaqu va dogoro nau Sa sa Nana tataru nabuna, meke kopu ni Sa sari Nana zinama.
4Koa si rau pa varikorapadi ri na kana, pu guana laione variva matedi, sari na livodi si ṉaru guana tupi na hopere, sari na meadi si ṉaru guana magu varipera.
5Kei Tamasa, Mu koa tavalavata si Goi panaulu pa Maṉauru! Sa Mua minataqara si mani ta dogoro pa doduru kasia popoa.
6Sari na qua kana si tavetia si keke sipata pude vagi au, talotaṉa hola si rau. Gelia rini si keke pou pude va hoqa au, gua, ba hoqa pule tugo teledia koasa pou asa.
7Kei Tamasa, raṉeraṉe valeana qua si rau, ke kaqu kera vahesi Igo rau si Goi.
8Maqu vaṉunu meke kera, maqu kera vahesia pa mike, maqu kera vahesia sa Tamasa pana munumunu vaqavaqasa.
9Kei Baṉara, kaqu zama leana si rau koa Goi pa varikorapadi rina butubutu, ke maqu kera vahesi Igo rau si Goi pa vasina koa sari na tinoni.
10Ura sa Mua tataru nabuna si kamo la koari na Maṉauru, meke sa tina ronuemu si kamo la koari na lei.
11Kei Tamasa, Mu vata dogoro nia sa Mua linavata koa sa Maṉauru, meke sa Mua ṉiniraṉira pa doduru kasia popoa.

Read Sam 57Sam 57
Compare Sam 57:1-11Sam 57:1-11