SAM 51:8-19

⁸Gata musipma tasiwi apbakngayok. Siakan siknga! Gata nae waiaknganae meya namukuyak. Namuke natane kwatana zipmanggamumbi apuking ngana gata na tasiwi kwatana waapa apata gatuna take siwanu nata apbakngawit.

⁹Gata waiaknga tasikumde undang gatuka ma kawim. Siwan gata natane gutongana kuupbam asandekngamuyo.

¹⁰Anutu, gata natane musipma tangenawi na musipma kayuk ba dundumna siwikge nataat. Gata natane waunga tangenake na waungu kayukapa naatang tengami nata gaekan natanggamatawa kekekayok.

¹¹Siwan gata na ma nanikwasiwi kuwam. Waungu takwan gataneapa naatang yuau gata ma kaiwi kuwan.

¹²Tupa gata na takuyakge apbakngakum. Ge apman kaya gata na gatuka tapi nata gatuna apbakngawit. Gata gatuka tasike natane musipma tangenawi nata gae wam tawamba kekekawan tasiwitden.

¹³Nata gae wam tawake aminu waiaknga tasikaingu yanindamumba waaminda gatane kepi noman takngaka kakapmake gae gatuna apning.

¹⁴Anutu, ga Anutu na takuyak tapanin, gata musip kwikwik natangamuke ma nuwi kupam. Unzing tasingami nata gae kap taike gata nae nomana aknga tasikuyak takngae natake kap taiwit.

¹⁵Buyambam tapa, gata na gatangami nata wam takngatu yakapmake gatane umanda aknga yatangenawit.

¹⁶Nata kaau gwendu takapuke gae yamuyamuk binga tasiwitde take natapinu nata asiknga takapuke akgamit ngana gata ie take dua nataayak. Siakan. Nata kaau gwendu tanguke yamuyamuk binga tasiwa katapda isisopubanu gata dua bakngawiyak.

¹⁷Ayok, Anutu! Nata ninae natapa epan nata gae gepbiatang koyuwit. Sike wa natane yamuyamuk takngana binga. Na atnataat. Gata aminu tapatuta inane waiaknganae meya natake umana inane aknga natapan epik. Natapan epan kake gata wa apae masa dua siknga imiyak.

¹⁸Siwan gata gika nataak kakngane aminu gatayami Saion yot gapmane takekan yutnong. Gata gatuka damanu Jerusalem yot gapmane gwenu gatuka tangenayo.

¹⁹Unzingge tapduu aomune amindabamu kepi noman taknga tawake gae ofa takekan gamuning. Gamuke aminu waakwakgane ofa inata inata katapda kuutgan yasikaing. Ngan, ikwawa gamanu wawi gwengwenu akgamunangge natake gatane alta dakane sawan yasiwan gamukaing.