SAM 48:4-13

⁴Tupa king takwakga Saionde amnangge tasiking. Waakwakga unekan yuke yotbamu wanggapmane inengan apbing.

⁵Waaminu kuku yotbam wanggapma kake zeetgaman akasatnaking. Kasatnake asiknga gwauke waakwau atdatakuking.

⁶Datakuke dandai kumzang yamuking. Dandai yamumban atdatakukingu wa unzing mayata engang bokngitnangge toknga nataaing binga sikut.

⁷Anutu, gata tasiwi gou buyambamu gunzitda akonggak kopatangga apbut. Apuke yotbamu Tarsis nanatane sipna buyambam gwegwenu apasiwan maiking.

⁸Ninu sanga wa Anututa tupa siknga tasikutdane wamu yawan atnatapbumang. Gatu apmaat kaa tasiwan gatunin kakumang. Ninu Buyambam tapatane yotbam gapmane yukumang. Anutu nindane apan, wa Anutu kekekngana kuupbam kayakan. Sike nindeaan sanga waaknga tasikut. Anututa yotbam gapma gwa tapan kekekakutde yotna gapma asinggan yuwik.

⁹Anutu, ninu gatane miti yot buyambam gwekatang yuamang. Yuke ninu ga ninde butaya asinggan natanimunggayak kakngae natanggamatakamang.

¹⁰Sike kepna kepna yuaingu aminu kuupbamda gatane umanda ayatangenakaing. Gatu aminu zendang zendangga yuaingu gatane umanda akngae apbakngakaing. Gata aminu kuupbam noman taknganekan kayuak.

¹¹Unzingge aminu tawanu Saion dakane yuaingu kuupbam apbaknganing. Gata aminu kuupbam noman taknganekan usanzikgaak. Unzingge aminu yotbamu Juda komune nanata asiknga baknganing.

¹²Ginda kepi kepi tawanu Saion dakane sukunong. Gatu damanu yot wanggapma takumbasikuune kuyuuk you kundu mamaya gwegwenu you wa gapma tasiwan kekeknga singgau kendetnong.

¹³Ginda Saiondane damanu kekeknga siknga gwegwende katak siknga natapnong. You kekeknga gwegwende kuut katak kanong. Kakenga aminu masan aatningu ginda yanikapnong.