SAM 45:5-17

⁵Gatane sakutda paanga siknga, siwan ita iwanda siakande yamningge tasiyo. Gata amak tasike yapbimbi gae gepbiatang koyutnong.

⁶Anutu, ga king kapa dakngake asinggan asinggan yuayak. Gata amindabamu kepi noman taknganekan kayuayak.

⁷Ga sanga noman takngaekan gwaam siknga natake waiakngae ga asiknga bitanggayak. Unzingge gikane Anutukata yangga wel taknga gwapakgane tukngwanggamuke tasiwan umanda kaapa dakngakuyak. Siwan ita tasiwan gata notda yapbike umanda kopsa apa dakngake apbakngakuyak.

⁸Sike gatane taukga aknga sanga kapanga kaa tasiwi taukga kapanga kaa siknga singgak. Siwan king kapatane yotna sanga kwaknga siknga dundumna siknga tasigwaanguke kap taikaing. Siwan kau waaknga taiwawa gata baknganggayak.

⁹Sike king kapa apatane yapanaat gatu maya kundu gata tasiwi umana kaya dakngakingkat yuaing. Sike katakga kwanaapane maya gata maatdae takuyak kapata dandamake yuak. Ita tauknga sanga golmani ngang yanikaingu you gapmandu Ofir gapmane nanata pasikingunin pasikut.

¹⁰Ga maya mateu king kapa apbae tanangge nataau, gata nae wam gwaamuke anzing natapso. Gata aminu yotda yuaingge apbotayo. Gatu gikandak notda sikngae kuut botayo.

¹¹Gata unzing tasiwi king kapata ganduke maya aapa take siknga ngang natanggamunggak. Waapa gatane buyambam tapaka, unzingge gata itane wam gwaamumso.

¹²Sike aminu Tair yotbam gapmane nanata sanga kundu gae gamunangge pakapning. Ngan, sanganambambanu waakwakge gata musip gwaang natayamiyakge sanga sanga gae gamuning.

¹³Maya mateu kinggane waapa yotna inatakan pekgak gwekatang yuwan kana gwaam siknga singgak. Sike tauknga sanga tretgol ngang yanikaingga pasikaingunin pasike yuak.

¹⁴Sike tauknga waaknga kunzi inata inata pasiking. Siwana kuupbamda maya waapa kingge takuuning. Siwan gatu maat matek notna apa apa iat gatake masene tawamba kuning.

¹⁵Waakwakga apbakngake musip gwaangu kuutnata natake king kapatane yotna buyambam gwekatangu kopning.

¹⁶Sike ga king kapa, masande gatane waakga kwaapzang siwik. Siwana itaa gatane bapuka tupa aaking ge tangge yutning. Waakga waakwau umana kaa siwan waakwakga aminu kepna kepna yuaingunin kayutning.

¹⁷Nata gatane umanda kopsa aknga yakapa aminu apmea aatningga masande gae asinggan natayutning. Unzing tasike aminu kepna kepna yuaingga gae umanu asinggan asinggan yatangenatning.