SAM 44:4-17

⁴Ga kingkapa, siwan natane Anutuna. Gata yawi Jekopdane dongata amau tasike iwana yapbitning.

⁵Gatane kekeknga aknganeta iwaninu yawapena kukaing. Gata ninkatang yuwawi aminu ninkat amakamangu yaipapaakusikamang.

⁶Na kweem ba sakutna kaya ngana na baniu sanga wanda gatangaman amau apme tasiwit ngangu dua nataat. Na gwauya kuut kaya siwan ngana nata amau tasiwawa ita dua gatangamik.

⁷Wena. Gata siknga gatanimi amau tasike iwaninda ninu dua nipbiking. Wena. Gaat gatu iat ngang amake gata ayapbikuyak.

⁸Anutu, gata take siknga gatanimiyakge natake ganimbakngakamang. Ganimbakngake asingganu ninda gatane umanda yatangenakamang.

⁹Siwan ngana apmanu dasing? Gata ninu masa gwa nimuke ninu iwaninde kaine tasiwi upeekamang. Siwan apmau ga nindane amak aminkat gatuka amakge dua gatake kukaing.

¹⁰Gata unzing tasiwi ninu iwanin kagwauke datakukumang. Datakuwatna ita apu nindane sangaapanin paking.

¹¹Gata ninu sipsip gwengwen yasikaing binga nisipan kumnimde nindupekuyak. Nindupewawi kepmine yuatna ngana ninikwasikuyak. Ninikwasiwi ninu unda undang kuke paku dongu kundue banakan yuamang.

¹²Gata ninu gikane amindabamu nindupewi dongu kundutane puya amina moo dakngakamang. Siwan ita ga buyana matekngata usiking. Gata supzainu buyambam dua pakuyak.

¹³Gata ninu unzing pasiwi dongu kundu ninde wesim yuaingga sapdut wam ninikaing. Ngan, aminu kunduta atninimike maaknga wam ninikaing.

¹⁴Gata pasiwi enake ie ninu dongu kunduta maaknga umaninu yakaing. Sanga kundu ninkatang aawan kakengu kumzang siknga ninimikaing.

¹⁵Nina natapa wai asinggan siwan na maaknga siknga nataat.

¹⁶Dasingge? Aminu kunduta sapdut wam nanike wamu waiaknga nanikaing. Sike kaawanu iwanaat gatu aminu kunduatda waiaknga yake nae tasinangge nataaing.

¹⁷Anutu, ninu gae dua botakumang. Aho! Gatane pasap wamba ninu dua yamasandemang. Siwan ngana sanga wa ninkatang apbut.