Sam 38:5-19

⁵Muzi meke humaṉa hikare sari na bakoraqu, ura kaleana hola sa qua dinuviduvili.

⁶Ene koqoho si rau sina gigiri sa qua tinasigiti, kabo alili si rau doduru rane.

⁷Maṉini hola sa tiniqu meke tata mate qua.

⁸Ta naqoto gore si rau meke loke qua ṉiniraṉira hokara; silava si rau sina koa pa tinasuna sa maqomaqoqu.

⁹Ke Baṉara, sa qua inokoro nomana pude ta salaṉa si gilania Goi. Bakala koa Goi sa qua tinasigiti.

¹⁰Duṉaduṉana sa buloqu, na malohoro si rau, meke rida tugo sari na mataqu.

¹¹Sari na qua baere na turaṉaqu si lopu hiva tata mae au, sina koa gua koari na tubuqu, meke sari na turaṉaqu soti ba turu va seu dia koa rau.

¹²Arini pu hata au pude va mate au si sekesekei nau rini. Arini pu hiva vata sigitau si sekesekei nau pude ṉoṉovalau, meke lopu makudo hatihati au rini pude raza au gua.

¹³Ba guana tie nuliqu si rau, sapu lopu boka avavosae, meke guana tie pokaqu si rau sapu lopu boka zama.

¹⁴Uve, guana tie nuliqu si rau, ke lopu boka olaṉa sina lopu avavosaequ.

¹⁵Ba koa Goi Zihova mo si kalavarae si rau; ke Baṉara, qua Tamasa, Agoi mo si kaqu harupau pa qua tinasuna.

¹⁶Tepa atu si rau, mu lopu va malumi Goi sari na qua kana pude eri nia sa qua tinasuna, madi lopu qetu nia rini sa qua hinoqa.

¹⁷Ura tata mate si rau, meke koa ta sigiti doduru rane.

¹⁸Helahelae ni rau sari na qua tinavete kaleadi; meke pulepaho ni rau sari na qua sinea.

¹⁹Ba ṉiṉira sarini pu kana hoboro nau; meke sokudi sarini pu kukiti sea nau.