Sam 37:16-32

¹⁶Sa vasi tinago hitekena tanisa tie toṉoto, si arilaena hola nia sa tinagotago nomana tadi na tie kaleadi.

¹⁷Kaqu va murimuria e Zihova sa ṉiniraṉira tadi na tie kaleadi, ba kaqu va sarei Sa sari na tie toṉoto.

¹⁸Tataru ni e Zihova sarini pu va tabea si Asa, meke kaqu tagoa rina tudia sa popoa sapu ele poni ni Sa ninae rane ka rane.

¹⁹Koari totoso kaleadi si lopu kaqu koa tasuna si arini, meke pa totoso soṉe ba kaqu ari gedi ginani.

²⁰Sari na tie kaleadi si kaqu mate palae, meke saripu kanaia se Zihova si kaqu guana havoro pu harahara meke mate, kaqu kekeṉoṉo guana tuṉaha sapu murimuri si arini.

²¹Sa tie kaleana si vagivagi paki meke lopu boka hobehobe pule. Ba sa tie toṉoto si na tie variponi, meke na ari gana ke variponi moka va soku.

²²Sarini pu tamanae koe Zihova si kaqu tagoa sa pepeso pu poni ni Sa, ba arini pu leve ni Sa si kaqu ta hadu taloa.

²³Turaṉi e Zihova sari tie vasina pu kaqu ene la ia sa, meke va sarei Sa sarini pu va qetua si Asa.

²⁴Be ta tubarae si arini, ba lopu kaqu hoqa, sina tuqei e Zihova sari na limadia.

²⁵Ele gelenaena sa qua tinoa, meke kamahire na barogoso si rau, ba lopu ele dogoria rau sapu muliṉi nia e Zihova si keke tie toṉoto, babe tepa lamae ginani pa tie sari na tuna.

²⁶Doduru totoso si variponi pa nana hiniva soti si asa, meke kaqu mana ni e Tamasa sari na tuna.

²⁷Luaria sa kinaleana, mamu tavetia gua sapu leana, pude kaqu koa hola ninae rane koasa popoa sari na tutimu.

²⁸Ura qetu nia e Zihova gua sapu toṉoto, meke lopu hite muliṉi ni Sa sari Nana tinoni pu soto va nabu koa Sa pa rinaṉeraṉe, aquni Sa si arini ninae rane, ba sari na tutidi rina tie kaleadi si kaqu ta hadu palae koasa pepeso.

²⁹Sari na tie toṉoto si kaqu tagoa sa popoa pu poni ni sa Tamasa, meke kaqu koa vasina sarini ninae rane ka rane.

³⁰Sa tie toṉoto si zama ni sari na zinama tumatumae, meke tozia sa sapu gua leana meke ṉoṉo.

³¹Va naqiti sa pa bulona sari na tinarae te Tamasa, meke lopu hite luari sa si arini.

³²Sa tie kaleana si pequ nia sa sa tie toṉoto pude va matea gana gua.