Text copied!
CopyCompare
Anututane Wam Kwikwiu Kayuk Kaknga Jesu Kraisda Takepbut Taknga Anin gatu Sam Kuupbam Lotutane Kap Taknga - SAM - SAM 35

SAM 35:8-28

Help us?
Click on verse(s) to share them!
8Siwan tapduu gwendune dua nataawa apasiwan mainanga akngata papsok. Siwan yapapna na tapikge teking gwenu gata tasiwi ina papsok. Gatu gapma kwaiking dakaatang kaa ina pimake pukunong.
9Buyambam tapata unzing gatangaman kakengu musipmaatangu apbakngawit. Ngan, ita na tapan take yuat takngae natake nata musip gwaang natangamit.
10Natangamuke banip gwaang wamu anzing yawit, “Buyambam tapa, ga binga tapatu dua yuak. Siwan gata kekekngana wena aminu take siknga gatayamunggayak. Unzing tasiwi aminu kekekngana kayata waaminu dua pasiwan maining.”
11Sike kem aminda nae wai takngatu dua tasikum ngana kumzang temanggaganupa nanikaing.
12Sike natanu waaminde takeakngakan tasiyamunggat. Siwan ngana yake itanu waiaknga nae tasikaing. Unzing tasiwan kake musipmaatangu meya siknga nataat.
13Siwan ngana nata yake waaminde unzing dua tasinggat. Wena siknga. Tapduu gwenduine waaminu mait siwawa kake butaya siknga asinggan nataat. Natake butaya tauksan tamaggat. Butaya natake nanam tomda yuwa waakngata meya namunggak. Siwan nata tumuk wam yawa ngana gata dua gatayamukuyak.
14Dua gatayami kake nata waaminde butaya notnaapae ba paana ba uyapnae nataaing binga natayamunggat. Sike nata kepi sukuke aminu tapatuta mingae akupan butaya natake kwanam sikgak binga nataat. Nata musipmane meya siknga natake kwanam sikgak binga natayuat.
15Siwan ngana nata meya pakum tapduk gwekatangu waaminu unekan yuke apbakngaking. Na dua natawa waaminda unekan yuke nae uman yaitakepnangge yaking. Aminu kundu nata dua kaatda nae wamu atemapa yake yuatakaknga wena naniking.
16Sike waaminda masa wamu kumzang nanike nae meya namuking. Ngan, waaminda masa wam siknga nanike nae apbitake nomna zipbutnanga siking.
17Buyambam tapa, unzing tasiwa tapduu datdasing kapeya? Gata na tapi waaminda na dua tasiwan maiwit. Waaminu kaap zongu laionda kaapna yasiwan kupan nanggak binga tasike na nutapan kupitde tasikaing. Unzingge na gata ie kataune sandeke tapso.
18Gata unzing tasiwinu nata gae gaak kaknga dongu inata inata apu unekan yutningune yawit. Siakande siknga. Nata gatane umanda aknga aminbamde banakan yuke yatangenawit.
19Sike aminu kunduta nae iwana yumdekan sikaing. Gata ma kapewi bakngake na naitakepning. Nae musip maiu yumdekan natangamukaing. Unzingge gata dua kapewi meya nata papitde baknganing.
20Sike gatu wamu kundusim paa nomanu takngatu notnaapaat katak yutnangge dua yakaing. Pout tasike wamu kundu yakaingu aminu nomanu kem wam yanike pasiwan mainingge yakaing.
21Gatu waamindakan wamu akaapmapa anzing temapa nanikaing, “Siakande siknga. Ninda akganduatna waiaknga tasikuyak,” ngang nanikaing.
22Siwan ngana Buyambam tapa, gata waaminu gwa kaak. Unzingge genda ma umukusike yuwim. Buyambam tapa, gata na ma napmake keu maa komdune kuke yuwim.
23Ga Anutu siwan natane Buyambam tapana. Gata enake apu na gatangamuyo. Enake wamu nata yanggau yakapmake papi kekekanong.
24Anutu, Buyambam tapana, gata noman takngakan tasinggayak. Gata gatangami iwanata aminu waapa noman takngakan tawanggaunin ngang natdetning. Gata dua kapewi nata maiwa nanduke baknganing.
25Gata dua kapewi wamu inae anzingu yaning, “Take siknga, sanga ninda tasinangge natamangu gwa tasina buya unin asaakgak,” ngangun. Gata dua kapewi anzingu yaning, “Ninda waapa gwa tasina mainggak,” ngangun.
26Sike aminu wa meya nata kaatdenu apbakngakaing aminde gata pasiwi apmaakawa natdetdetna panggutokayo. Sike waaminda inane umana aknga yapangenakaingu wa na tasiwan maiwikge. Unzingge gata pasiwi umana wena akwak dakngake apmaakanong.
27Sike ngana aminu kunduta nae amin noman ngang natapningu, gata pasiwi apbakngake musip gwaang natake kapzang yanggamatanong. Asingganu waaminda anzing yanong, “Buyambamtapa wa tupan amintapa, ita puya amina noman yuwan kake apbaknganggak.”
28Unzingge gatane noman takngaka yakapmake umanda aknga kwakngaom gatu zikaane ngang asinggan yatangenawit.

Read SAM 35SAM 35
Compare SAM 35:8-28SAM 35:8-28