Sam 35:7-20

⁷Ura tavete hobori rini sari na binalabala kaleadi meke va padapada mae ni koa rau. Kekeṉoṉo guana gelia rini sa pou pude va hoqau gua.

⁸Mani raza pule koarini sa tinahuara totoso lopu hite rovea rini. Sari na binalabala kaleadi pu va pada ni rini koa rau si madi raza pule tugo koarini, madi ta huarae gedi vasina.

⁹Meke kaqu qetuqetu nia sa buloqu se Zihova, sina ele harupau Sa koari na qua kana.

¹⁰Pa doduruna sa qua tinoa si kaqu zama la si rau koe Zihova, “Kei Zihova, loke tie si kekeṉoṉo gua Agoi. Va sarei Goi saripu malohoro koari pu ṉiṉira, meke saripu malaṉa si harupi Goi koarini pu ṉoṉovali si arini.”

¹¹Sari na tie va sosode kokohadi si turu mae meke zutu au, koari na tinavete pu lopu hite gilani rau.

¹²Hobe nia kinaleana rini sa qua tinavete leana, ke lodu mate sa maqomaqoqu pa tinalotaṉa.

¹³Ba totoso moho rini si hoke va sagei rau sari na poko baika, meke koa madi pa ginani si rau pa tinalotaṉa. Todoṉo si rau pa vinaravara,

¹⁴guana varavara nia rau si keke qua baere, babe keke tasiqu. Ene totodoṉo si rau pa tinalotaṉa nomana kekeṉoṉo gua sapu talotaṉa nia sa tie sa tinana matena.

¹⁵Ba sipu koa tasuna rau si qetu si arini, meke habotu varivarigarae na va sisire nau rini. Sarini pu lopu hite gilanau ba lopu makudo nanae nau.

¹⁶Pesipesi hoborau rini sipu loke dia ginugua koarau. Garata livodi si arini sipu doṉo mae au rini.

¹⁷Kei Baṉara, vea seunae gua si kote dodogoro Mua mo koa rau pa tinasuna si Goi? Mu va sare au koari pu ṉoṉovalau. Harupau koari na qua kana pu ṉiṉira guana laione.

¹⁸Meke kaqu zama leana koa Goi si rau pa varikorapadi ri na Mua puku tie. Kaqu vahesigo rau pa kenudi ri doduru.

¹⁹Mu lopu va malumi sari kasa tie kokohadi pu kanau pude qetu nia sa qua kinilasa. Madi lopu vari matamatapuri nau rini pu kukiti hoboro nau.

²⁰Ura lopu koa baere si arini koari na tie, ba va podopodoe ni koha tu rini sarini pu koa bule.