Sam 35:21-28

²¹Velavela nau rini meke zama, “Ele pohoa gami gua sapu tavetia goi!” gua si arini.

²²Kei Zihova, ele dogoria tu Goi gua sapu ta evaṉa. Ke Mu norei gedi sari na qua kana. Mu lopu koa va seu koa rau.

²³Kei Zihova, Mu tuturei mae, Mamu lavelave hukata nau. Mu tuturei mae, Mamu toka nau Tamasa, qua Baṉara.

²⁴Mu tozi vura nia sapu viaqu si rau, kei Zihova, qua Tamasa; madi lopu qetu nia rina qua kana sa qua tinasuna.

²⁵Madi lopu zama si arini, “Ele gorevura sapu gua hiva nia gita.” Madi lopu zama “Ele voi pa nada sipata gita si asa,” gua.

²⁶Madi tava kilasa na tava nunala sarini pu qetu nia sa qua tinasuna. Madi koa kurekure na talotaṉa si arini pu va lavata puleni.

²⁷Madi velavela pa qinetuqetu sarini pu okoro dogoria sapu lopu sea si rau. Madi zama pilipule nia sapu guahe, “Marilaena se Zihova, qetu nia Sa sa vinasare tanisa Nana nabulu,” gua.

²⁸Meke kaqu tozi vura nia rau sa Mua tinoṉoto, meke sa vinahesimu doduru rane.