Sam 34:6-22

⁶Ne poka uara mainawo wimoieno tane Iawe God mampe rauparinteno etanen, ne poka etedino me inanen.

⁷Apana mida Iawe God wiwirawantoia, me enseliwa mo oniamode, me mo gonaamodio do waimoi.

⁸Sa baiwa e Iawe God mampeitane ita me euwaa dauwaida etana. Naita e me onialepia baiwa mampe aitana, e nuaeuitana.

⁹E sumanailala Iawe God ebowa debamasana. Apana mida me ebowa debamasaia mai dima abolawantopu.

¹⁰Walama isiwa pue laion omana tomodio lai, tane mida Iawe God sumanaiwantoia nitu uduudu mampe rua os waimoi mai nitu da abolawantopu, dia.

¹¹Ne obaina, mainawo winlene gagalona etana. Ne waeuwalepo Iawe God wiwirawaitonuna.

¹²E wanwan daumawa ita do wanwan euda waina menalempa,

¹³mai apana wakadisamonuna do mai laga wanuna.

¹⁴Kadiwa dewasailana ene tane euda dewasana, ita apana saumono wanwan euda obasa wampu.

¹⁵Iawe God emawa apana dewa dodomana dewasaia osouwo winede, mo sau baiwa me mampe iririntoio etamode.

¹⁶Tane kadi dewasaia apanawa mampo me namba nambesade, mo bontopuo ando mai mida mo umanau wapi, dia.

¹⁷Iawe God apanawa me mampe sau baiwa iririntompo etamopi, me mo poka uduudu bedewe saumopie inamopi.

¹⁸Apana mida insaisau omaomala Iawe God ipa mo do, ita mo mida nuabolantoie insaisau omedia me saumopie insaisau badosapi.

¹⁹Dewa dodomana dewasaia apanawa poka saiwa uara donsai, tane Iawe God walama uduudu mo saumodie inamode.

²⁰Me emawa mo osouwo, sa baiwa mai neaipu da tewapi.

²¹Tane kadi dewalala, mo muba kadiwa dewasaia kadimopi, ita apana mida dodomana dewasaio emalawoamoia matangelawa mo wadapu.

²²Tane Iawe God me nolawa dewalala inamode. Apana mida Iawe God saumopie inamopia baiwa me mampe antoia mai matangela donsapu, dia.