SAM 32:1-9

¹Sike aminu tapatu Anututa gutongana kake wai waakngana sandekngamanu aminu waapata apbakngayok. Ngan, Anututa waiaknga waakwau pasiwan sopuwan dua siknga natapikge apbakngayok

²Siwan aminu tapatu waiaknga tasinggau Buyambam tapata yawan aminu waapatane gutongana apmanu wena siwanu aminu waapata apbakngayok. Musiaatangu kem taknga aknga dua natake tawanggak kapanin.

³Nata wamu takngatusimu dua yayuuk zikaane gatu gunzit tapane ngangu kwanamu kumzang sikum. Unzing siwawa natane gupma apatdekut.

⁴Dasingge, gunzit tapane gatu zikaane gata meya takngatu takngatu namuwawi natane kekekngana kuupbam wena sikut. Unzing gunzitda kepdaka isiwan wawaakgak binga sikum.

⁵Masande nata waiakngana gae yakapbum. Nata waiakngana dua takusopukum. Sike nata anzing yakum, “Nata waiakangana kuupbam Buyambam tapae yakapit,” ngang yake nata yakapa gata waiakngana kuupbam asandekngamukuyak.

⁶Unzingge aminu kuupbamu ga gawakaingu apmanu waaminda tumuk wam ganinong. Sike meya aknga buyambam ba siwik, unzing yanggata buyambam paptake amin kaitake kunggak binga siwanu, meya akngata waaminu dua pasiwan maining. Wena Siknga!

⁷Ga natane akusopunggat tapana siknga. Nata undang kusopuwa gata na kakuya tasiwi meya akngata na dua tasiwan pimapit. Gata na meya akngane pimambanu gata na atanggayak. Anzing tasinggayakge nata apbakngake kau kumzang tainggat.

⁸Buyambam tapata anzing yanggak, “Nata ga katak siknga ganindamuke nata kepiapa yeikgama waapane asiknga kuyo. Siwan nata ganindamuke natdetdetda tapa kakaawan nata ga kakuya tasiwit.

⁹Gata ikwawa gamanu hos ba dongki binga dua dakngawim. Sike ikwawa wa gweayau natdetdetna wena. Unzingge gata ainu napna mamaya dakau genane peyo. Peke nap takngaat peke panomanuwawi wanggwak kuson. Sike gata unzing dua tasiwinu gata natapiak kaknga dua tawasan.”