Sam 31:5-21

⁵Pa limamu Goi si luara vatu nia rau sa qua tinoa. Kei Zihova, Mu harupau Goi si rau, Tamasa ta ronuemu.

⁶Kukiti ni Goi saripu vahesi tamasa beku, ba arau si kalavarae koa Agoi.

⁷Kaqu qetu zoṉazoṉa nia rau sa Mua tataru nabuna, sina ele dogori Goi sari na qua tinasigiti, meke ele gilani Goi sari na qua tinasuna.

⁸Meke lopu luara pani au Goi pa limadia rina qua kana; ba poni nau Goi sa tinarupaha pude la vasina pu hiva la rau.

⁹Mu tataru nau, kei Zihova, ura koa pa tinasuna si rau. Sari na mataqu si ele mabo hola kabo, meke gua tugo sa doduruna sa qua tinoa.

¹⁰Sa qua tinoa si koa mo pa tinalotaṉa, meke sari na vuaheniqu si korapa hola taloa pa kinuliusu. Malohoro sa tiniqu pa qua tinasuna, kamo koari na susuriqu.

¹¹Sari doduru qua kana meke saripu koa tata koa rau si va loke laequ au si arau. Sarini pu gilanau ba etulu pani au, meke pana dogorau rini pa siraṉa si govete nau rini.

¹²Ele ta muliṉae si rau guana tie ele matequ. Ele ta kilu palae guana raro lopaqu si rau.

¹³Avosia rau sa vevehedi rina qua kana; na tinasuna variva matagutuna si koa pa vari likohaequ. Mizi vekoa rini sa kinuhanaqu pude va mate au gua.

¹⁴Ba kalavarae si rau koa Goi Zihova, Agoi mo sa qua Tamasa.

¹⁵Sari na qua totoso si koa pa Limamu Agoi. Mu va sare au pa limadi rina qua kana, meke koarini pu hadu luli au pude va mate au.

¹⁶Mu kopu nia sa Mua nabulu pa Mua tataru variva tukana. Mu harupau pa Mua tataru nabuna.

¹⁷Kei Zihova, maqu lopu tava kurekure si rau, ura koa Goi si kalavarae atu rau. Madi tava kilasa sari na tie kaleadi, madi lopu zama pule, ba mate palae gedi.

¹⁸Madi tava mokomoko sari na tie kokoha, ura vahesi puleni meke zutui rini sari na tie toṉotodi.

¹⁹Kei, nake sokudi hola sari na Mua lineana, saripu va nama veko ni Goi koarini pu pamaṉa Nigo! Gilana betoa ri doduru tie sa Mua tataru, meke gua sapu ele kopu guni ni Goi sarini pu kalavarae koa Goi.

²⁰Tomei Goi si arini pude tava sare pa kenumu Goi, koari na ṉinovaṉovala tadi na tie. Va aqori Goi si arini pa keke vasina tometomeana kapae koa Goi, meke tava ilolo koari na zinama ṉoṉovala tadi na kana.

²¹Mani tava lavata se Zihova, ura ele va sare au Sa sipu mae rapata vari likohae nau rina qua kana.