SAM 30:4-11

⁴Ginu aminu Anututane aminabam, ginda kau itane umana yatangenake tainong.

⁵Sike ita kaanga tapduu dapaknga siknga natanimunggak. Natake ngana ita ninde musia kwikwiknga tapduu ninda kayuk yuamang komune natanimunggak. Kai yangganinu zikaane apimakaing. Siwan ngana tembana ninu gatu apbaknganim.

⁶Tupa nata ninane kekeknganane yuke meya takngatu nae dua apik, ngang natake anzing yakum, “Sanga tapatuta na ikomban pimananga dua,” ngang yakum.

⁷Siwan ngana, Buyambam tapa, tapduu ga nae take siknga natangamukuyak komune gata na tasiwi kekekake yukum. Unzing, daman gwenda tawan dakane kekeknga yuak binga. Siwan ngana tapduu gata na napmake akusopukuyak komune na gwaut takngata na asiknga tanggaganukut.

⁸Buyambam tapa, nata gae yanggawakum. Ngan, Buyambam tapata nae butaya natapikge natake nata kekeknga siknga yanggawakum.

⁹Sike nata akupanu sanga nomanu dasing bingata aawik? Sike nata akungwake matmaune kuwanu sanga waakngata mamin gatangamik? Aminu gwa kumbingga gatane umanda apme yatangenatning ba dasing? Asikaya waaminda asingganu gata waaminde take tasiyamukuyak kakngae yakapning ba dasing? Wena. Dua yakapning.

¹⁰Buyambam tapa, gata nae natapso. Natake nae musip kwikwik natangamuyo. Buyambam tapa, gata na gatangamuyo.

¹¹Gatangamuke gata musipma kwanam siknggat taknga gwa sandekngamuke tasiwi nata kau apbakngake tainggat. Tupa na meya siknga natayukum ngana nata kwanam sikum takngae yake tasiwi natane musipmaatang asiknga baknganggat.