Sam 30:1-8

¹(Keke kinera te Devita pude va madia sa Zelepade) Zihova, va lavatigo rau si Goi, sina ele va sare au Goi meke lopu va kilasau rina qua kana.

²Kei Zihova, qua Tamasa, ele varavara atu si rau koa Agoi, meke ele salaṉau Goi.

³Zihova, ele harupu pule nau Goi koa sa lovu, ele va sare au Goi koa rini pu hiva va mate au.

⁴Mi kera vahesia se Zihova, ke gamu na tie raṉeraṉe; mi va lavatia sa pozana hopena.

⁵Ura sa Nana binugoro si pa totoso papakana mo, ba sa Nana minana koa rini pu qetu ni Sa si koa hola ninae rane. Sa kinabokabo si pa keke boṉi holana mo, ba pana munumunu si na qinetuqetu marilaena.

⁶Meke zama si rau, “Ba lopu kaqu tava kilasa si rau,” gua, ura sokirae nia rau koe Zihova sa qua rinaṉeraṉe.

⁷Ele toka nau Goi Zihova pa Mua tataru, ke lopu tava rizu sa qua tinoa guana toqere, ba pana lopu olaṉau Goi pa tinasuna si tarazuzu pa minatagutu si rau.

⁸Koa Goi Zihova mo si varavara atu rau, koa Goi Baṉara si tepa atua rau sa tinokae.