Sam 25:9-16

⁹(Yod) Turaṉi Sa si arini pu va pepekae koasa siraṉa toṉotona; va tumatumae nia Sa koa rini sa Nana hiniva pude lulia rini.

¹⁰(Kaph) Doduru totoso si turaṉi Zihova sari na tie koari Nana tataru nabuna meke na hinokara; ta ronuena si Asa koarini pu kopuni sari Nana vinariva egoi na tinarae.

¹¹(Lamed) Kei Zihova, Mu taleoso nau koari na qua sinea, koa gua koasa laena sa Pozamu, sina soku hola tugo sari na qua sinea.

¹²(Mem) Sarini pu pamaṉa nia se Zihova, si kaqu va tumatumaeni Sa sa Nana hiniva pude lulia rini.

¹³(Nun) Kaqu marevutu si arini doduru totoso, meke sari na tudia rina tudia si kaqu tagoa sa popoa pepeso.

¹⁴(Samek) E Zihova sina baere tadirini pu va tabea si Asa, meke vata dogoro nia Sa sa nana vinariva egoi nabuna koa rini.

¹⁵(Ain) Kalavarae si rau koe Zihova doduru totoso, meke va sare au Sa pa tinasuna.

¹⁶(Pe) Mu doṉo mae au, ba Zihova, Mamu tataru nau, sina loke tie si toka nau, meke koa pa tinasuna si rau.