SAM 25:1-14

¹Buyambam tapa, nata apmanu gae tumuk wamu ganinggat.

²Ga natane Anutuna. Nata gaekan baniu singgat. Gata gatangamuke iwana dua kapewi na napbimban maakawit. Gata iwana dua kapewi na yaitakepuke waaminda baknganing.

³Sike aminu gae banip sikaingu gata iwana dua kapewi yapbimban maakaning. Wena. Aminu kem yake tanziu yumdekan tasikaingu waamindakan waiaknga tasikaingge natake apmaakaning.

⁴Buyambam tapa, gata kepi gikane take akngaka yeikngami kawit. Ngan, gata gikane kepi noman taknga nanindamumso.

⁵Gata siakan wamu gikane aknga tawambitde nanindamumso. Dasingge, ga natane Anutuna. Gata na tapi iwanata dua napbitning. Sike tapdukbam asinggan asinggan gata gatangamiyakge gae ganduyuat.

⁶Buyambam tapa, gikane natdetdetdaatangu musip kwikwikat gatu butaya akngaatde natapso. Gata waaknga tupata tasitakakopbuyaknga gatu apman kaa atasinggayak.

⁷Anutu, gata waiakngaat gatu yamandet takngaat waatdakane yuke tasikumde ma natapim. Ga Anutu butaya akngatane toiknga apa. Siwan ga, Buyambam tapa, gata take siknga asinggan yuke nae natake musip kwikwiu natangamunggayak.

⁸Buyambamtapa take siwan noman sikngaapa. Ge ita waiaknga tasikaing aminu yanimbitake iekan tawaningge yanindamukgak.

⁹Ita noman takngane ie gepbiatang yuke inane umana dua yatangenakaingu yanipake kunggak. Kuke itakan kepi noman takngakan tawaningge yanindamukgak.

¹⁰Aminu Anututa wamu yawan kekekakut taknga gatu mama wamna ngang tawakaing aminde Anututa musia kwikwiknga akngana dua sandeke asinggan asinggan natayamik.

¹¹Anutu, gikane wamba yawi kekekakut taknga tawake nata meya kwaapzangu tasikumu sandekngamuyo. Siwan sandekngamuke tasiwi gatane umanda kopsa siwik.

¹²Mamin aminda Buyambam tapae gwaukaing? Aminu wa Buyambam tapae gwauke Buyambam tapatane wamna tawambanu, Anututa kepi nomantapa yeuyamik. Yeuyaman waapane kuninggen.

¹³Unzing aminu sanga sanga kwaapzang pake take siknga yutning. Take yuke waamindane waatdakana masande keu andakane take yutning.

¹⁴Anututa notna ngangu aminu ie gepbiatang koyuaingge nataak. Siwan ita kepi noman takngna tawaningge yanindamukgak.