SAM 22:1-25

¹Anutuna! Natane Anutuna! Dasingge na napmanggayak? Dasingge gata na dua siknga gatangamunggayak? Dasingge gata kwanamu nata gae sikgat takngae maau dua siknga panggayak?

²Anutu, nata gae gunzit tapane yanggawanggat. Siwan gatu zikaane kuut yanggawake na dua yuwa takanggak. Siwan ngana gata yake nae wamu dua natanggamunggayak.

³Siwan ngana, ga dundumna siknga apaunin. Siwan gata tupan siknga apa, enane siknga yuwayaunin. Ge Isrel nana aminda gatane umanda yatangenakaing.

⁴Tupa siknga nindane bapuninda gae banip siking. Waaminda gae banip siwa gata papi take yuking.

⁵Siwan waaminda gae yanggawawa gata iwande kataune sandeke pakuyak. Waaminda gae banip siknga siking. Siwan gae musiane meya dua natapbing.

⁶Siwan ngana na sanga yumdekanu kundu binga yuat. Unzing na gomou mateknga kep ganangkatang yuaing binga yuat. Siwan aminbamda sapdut wam nanike nae masa namukaing.

⁷Aminu kuupbamda na nanduke, “Gataaa,” ngang nanimikaing. Waaminda nae yembi tengamuke nanisapduke gwapaknga makaikaing.

⁸Siwan waaminda anzing yakaing, “Ita Buyambam tapae baniu asinggakge asikaya Buyambam tapata gatuna tapik? Buyambam tapata ie take nataakge ita apba sandekngaman take siwik,” ngang yakaing.

⁹Unzing yakaing ngana, Anutu, gata gika siknga na mingae musip ganang katang tapi aake take apbum. Apa gatangami ngwamu nakum komune kakuya tasikuyak.

¹⁰Na mingata tangaiwan baniu gae sikumuneta apu apman apunggak. Mingata kayuk siknga takuune ga natane Anutuna yukuyak.

¹¹Sike gata na ma napmambim. Dasingge, meya apmanu nae apukaing. Na aminu gatangamunanga tapatu wena.

¹²Sike unzing. Ikwawa gamanu wawi gwengwenda binga na nandusatnake umupbasikaing. Ngan, ikwawa gamanu wawi kekekngana kaya, siwan wa gwengwenu keu Basan komune nanata na umutnawakaing.

¹³Sike wa unzing, laion gwengwenda ainggamatake kumzang yayuk kaana wetzukuke na nasinangge natake gena akngakaing.

¹⁴Sike natane kekekngana kuupbam gwa isangepunggak. Unzing yangga moo tukngwamba kuke zakngakaing binga. Siwan kwatanatane ngwaknga ngwakngana kuupbam gwa ziwa yuking. Unzingge natane musipma tuyuknga siknga siwan kekekananga dua. Unzing kaanata puke dauyapmakaing binga.

¹⁵Sike natane kekeknga akngana gwa isangepunggak. Unzing dopangu pupuknga sike pukaing binga. Sike natane guyaknga kupia siknga gwa singgak. Siwan yembina kuut genane gwa gatanggak. Gata na tasiwi nata paa siknga gatukande kungwanggat.

¹⁶Siwan wai aminu waakwakga na keu kuupbam nawake umupbasikaing. Unzing kamunda kaap zong umuyawakaing binga. Sike natane kataknga gatu kepina ngangu genata namukaing.

¹⁷Siwan natane gupma kwatanakan singgak. Siwan waaminda kumzang nanduyuke nata wai siwitde apbakngakaing.

¹⁸Sike waaminda natane taukngae kas binga tasike usanzike natane tauknga, “Mamindaka tapik,” ngang natake tasike sandu sandu inandek inandek pakaing.

¹⁹Siwan ngana, Buyambam tapa, maa yuke na ma nandutewim. Gata na kekekangamunggayak kapanin. Gata zet apu gatangamuyo.

²⁰Siwan na gata katak tapi waaminda na bainatda dua nuwa kupit. Gata na tapi aminu kamun binga waakwakga na dua nasiwa kupit.

²¹Gata na tapi waaminda na laionda kaap zong nakaing binga nutnangge tasiwa maiwik. Sike waaminu ikwawa gamanu zong dakngake yuaingga binga kom nata namnangge tasikaing. Siwan ngana gata waakwakge kataune sandeke gatuka na tapso.

²²Gata unzing tasiwinu nata notnabamde gatane umanda buyambamu yanikapit. Sike tapduu miti kanangge unekan yutningune na banakan kuke gae siknga inata kundu natapit.

²³Ginu Anututane donga, ginda ie gwangat natapnong. Ngan, ginu Jekopdane donga, ginda itane umana yatangenatnong. Ngan, ginu Isrel aminde donga, ginda ie akgwautnong.

²⁴Dasingge? Ita meya buyak yuaing aminde masa dua yamunggak. Gatu waaminda meya pakaingge ita natapan sanga moo binga dua singgak. Ita waaminu peke paku maa dua yuak. Aho. Ita waamindane tumuk wamna natake akgatayamunggak.

²⁵Sike miti kanangge unekan yutning gwene nata gatane umandakan yatangenawit. Sike wamu sangabamu nata pasiwitde yawa kekekakut taknga aminu gae akgwaukaing aminde kaine atasiwit.