Sam 17:5-14

⁵Ele ene luli valeania rau sa Mua siraṉa, meke lopu hite va karia rau si keketoṉa.

⁶Kei Tamasa, varavara atu si rau, sina avosau Goi. Mu va taliṉa mae au, Mamu avosi sari na qua zinama.

⁷Mamu vata dogoro nia sa Mua tataru nabuna, Mamu harupau. Koa Goi si tava sare si rau koari na qua kana, sina kalavarae si rau koa Goi.

⁸Mamu kopu totoko nau gua sapu kopu totoko pule Nigo, Mamu tomeau pa kaurudi ri na tatapurumu,

⁹pude qu tava sare koari na tie kaleadi pu ṉoṉovalau, na tie variva mate pu koa vari likohae nau.

¹⁰Loke dia tataru si arini, meke vahesi puleni pa dia zinama.

¹¹Pitu lulia rini sa qua inene, meke mae kamo au rini. Hatahata luliau rini, pude va mateau, gua.

¹²Kekeṉoṉo gua na laione si arini, sapu tome aqa pude garata va mate au, gua.

¹³Kei Zihova, mae toka nau! Mu turu varipera koari na qua kana, Mamu harupau koari na tie kaleadi koasa Mua magu varipera.

¹⁴Kei Zihova, harupau koari na tie kaleadi. Ele vagi rini doduru gua pu kaqu vagi rini koasa kasia popoa hie. Mu va kilasi gedi pa tinasigiti sapu ele va nama veko poni Goi pude tadirini. Va hia i tugo sari na tinasigiti koari na tudia meke rina tudia rina tudia.