SAM 147:3-16

³Ita aminbamu apasiwan nomatakaing. Unzing meyata natdetdetna pasiwan maikaingun. Gatu watana kuut wamayamunggak.

⁴Sike ita yekap daau datdasingga ngangu gwa yawan yukut. Siwan ita yekap daau umana gwendu gwendu ayaninggak.

⁵Buyambam tapaninu umana kopsa siwan kekeknga kuupbam kayakan. Ninda itane natdetdetna tuwangutnanga dua.

⁶Sike ita aminu inane umana dua yapangenakaingu ita wa amindane umana ayapangenakgak. Siwan ngana wai aminu ita kapzang siknga yaipakepu peak.

⁷Buyambam tapae kap taike umana yatangenatnong. Gita dakandaka zipna gakngae noman ayawan Anutuninde ininim.

⁸Sike ita tasiwan minga aknga ena kakaa komune yuak. Yuwana sopa tewan epu zongazonga pasiwan tawan dakandakane akokaing.

⁹Ita nanamu ikwawa gaman gwegwende kuut yamunggak. Sike gatu kombunananggane matekngata ba yawan kaya ie nanamu ayamunggak.

¹⁰Sike Buyambam tapa hos kekeknga gwegwende gatu aminu kekeknga apapae dua baknganggak. Aho.

¹¹Aminu ie akgwaukaing amindekan baknganggak. Ita butaya asinggan natayamunggakge banip sikaing amindekan baknganggak.

¹²Ginu Jerusalem nana amin, Buyambam tapatane umana initangenatnong. Ginu Saion nana amin, Anutusatane umana initangenatnong.

¹³Dasingge, ita damandane gwambok gwakgwau apapan kekekakaing. Ga Jerusalemdanen. Siwan ita gatane amindabamu take gatayamunggak.

¹⁴Ita gindane kepza kayuak. Kayuke gindane witza pasiwan puyasa atang take siknga akopa pake napa musipza dokaing.

¹⁵Sike ita wamu takngatu ba yawanu, zaat gaman siknga wamu waaknga yekau tepuke keu andakane epunggak.

¹⁶Ita sopa zambamu kwaapzang pewan epuke kepdaka usukwatapmanggak.