Sam 146:4-8

⁴Pana mate rini si pule la mo pa pepeso si arini, meke pa rane tugo asa si ta huarae sari doduru dia minizimizi veko.

⁵Tamanae tugo si asa pu ta tokae koasa Tamasa te Zekopi, sapu kalavarae koe Zihova sa nana Tamasa,

⁶Sapu tavetena sa maṉauru, na pepeso, na kolo lamana, meke sari doduru tiṉitoṉa pu koadi vasina, Asa sapu kopu ni sari Nana zinama ninae rane ka rane.

⁷Vilasa va toṉoto si Asa pude tokani saripu ta ṉoṉovala, meke poni ni ginani Sa saripu oviadi. Vata rupahi e Zihova saripu ta pusidi,

⁸meke va dodogorae i Sa saripu behu. Ovulu sage ni Sa saripu hoqa. Tataru ni e Zihova sari na tie toṉoto.