Sam 145:9-21

⁹Neni i vukat ti limixin axap la i ruuna labalamu tinedi limixin axap ni ga rudum di.

¹⁰Leeme Silok, lempanga rooro axap nenu uga rudum li di, dinaba emi asu minu, la limixin axap taram dinaba tong avukat tu.

¹¹Dinaba paase mumu lisisixam la lolos at lixitkis orong taram, la dina tong axasep limixin mi lolos taram,

¹²kusu limixin axap dinabak leklen leven gugu lolos taram la lisisixam maraanu at lixitkis orong taram.

¹³Lixitkis orong taram naba nemen lexen, la nenu Loorong Avolo, kopmen tekavaxap taram. Leeme Silok ik lox asoorun amisik leveng kakaape ren. La ik lox asuusu labalamu ren keneng at leven gugu axap teren.

¹⁴Ik lok tooro nedi di vekip tangarang mi levenmumuat, la im tebeng aonon nedi ua diga subu.

¹⁵Leeme Silok, levempanga rooro axap di reven tu mi leven doxoma voovo atdi, la um taba nedi mi leveluxa ua dik pakes tin.

¹⁶Um taba epovo rinotno nedi, la uk lox epovo rinotno levem pakpakes atnedi axap.

¹⁷Loklok at Leeme Silok in manton tinotno keneng at levempanga axap neni ik lox i, leven gugu ren ik lox i, ik lox i eburu mi lebelen tuntun teren.

¹⁸Neni ik lok saparap nedi mo di ngising tin, nedi mo di ngising tin mi luruturun.

¹⁹Neni im taba epovo ri levem pakpakes atnedi ua dim taba asinorong i. Ing tonga leven anteng atnedi la irak lox asepsu nedi.

²⁰Neni ik lok see atnedi ua di vavara aleng tin, ketla neni naba sev amet nedi limixin dixo mumu asu i.

²¹Anaba emi asu amisik mi Leeme Silok. La mo lempanga axap ua neni ga rudum i, dina emi asu amisik mi laasen kaala ren la kopmen tekavaxap at leemi asu rin.