Sam 141:1-6

¹(Keke kinera te Devita) Kei Zihova, tepa atu si rau, Mu tuturei toka nau! Mu avoso mae au pana tepa atu rau!

²Mu balabala gunia na vina vukivukihi humaṉa lea sa qua vinaravara, meke sari na limaqu pu ovulu sage ni rau si Mu guni na vina vukivukihi veluvelu.

³Kei Zihova, Mu kopu nia sa ṉuzuqu, Mu guana tie kopu sasada pa beruqu, pude lopu tozi vura nia rau sa sinea,

⁴Mu va ilolo au koari na inokorodi rina tinavete kaleadi, meke pa sinomana koa rina tie kaleadi pa dia tinavete kaleadi, maqu lopu hite somana nia si keke dia inevaṉa.

⁵Keke tie leana si mani va toṉoto au pa tataru, ba sa vina lavataqu koari na tie kaleadi si namu lopu kaqu va ego hokaria rau, sina hoke varavara va kari i rau sari na dia tinavete kaleadi.

⁶Pana ta vala sari na dia koimata pude ta zutu pa minate koari pu zutudi, si kaqu gilania rina tie sapu hinokara sari na qua zinama.