Sam 136:7-25

⁷Taveti Sa sari na rimata na sidara, ura sa Nana tataru nabuna si koa hola ninae rane.

⁸Sa rimata si va kalalasia sa rane, ura sa Nana tataru nabuna si koa hola ninae rane.

⁹Sari na sidara na pinopino si va kalalasia sa boṉi, ura sa Nana tataru nabuna si koa hola ninae rane.

¹⁰Asa tugo sapu va matedi sari na tudia koreo kenudi ri pa Izipi, ura sa Nana tataru nabuna si koa hola ninae rane.

¹¹Turaṉa vura ni Sa pa Izipi sari na tie Izireli, ura sa Nana tataru nabuna si koa hola ninae rane.

¹²Koari na lima heheda Tanisa si qaqama lani sa pude harupi, ura sa Nana tataru nabuna si koa hola ninae rane.

¹³Asa tugo vari paqaha nia sa Kolo Ziṉara, ura sa Nana tataru nabuna si koa hola ninae rane.

¹⁴Meke turaṉa va karovi Sa sari Nana tie, ura sa Nana tataru nabuna si koa hola ninae rane.

¹⁵Va lodu matea Sa pa kolo se Pero meke sari nana tie varipera, ura sa Nana tataru nabuna si koa hola ninae rane.

¹⁶Turaṉi Sa pa korapa qega sari Nana tie, ura sa Nana tataru nabuna si koa hola ninae rane.

¹⁷Va matei Sa sari na baṉara ṉiṉiradi, ura sa Nana tataru nabuna si koa hola ninae rane.

¹⁸Seke va matei Sa sari na baṉara ta gilanadi pa doduru tie, ura sa Nana tataru nabuna si koa hola ninae rane.

¹⁹Sihoni, sa baṉara tanisa butubutu Amoraiti si keke koa rini, ura sa Nana tataru nabuna si koa hola ninae rane,

²⁰meke e Oqo tugo, sa baṉara pa Basani; ura sa Nana tataru nabuna si koa hola ninae rane.

²¹Poni sa koari Nana tie sari na dia popoa, ura sa Nana tataru nabuna si koa hola ninae rane.

²²Vala ni Sa si arini koari na tie Izireli sari Nana nabulu, ura sa Nana tataru nabuna si koa hola ninae rane.

²³Lopu muliṉini gita Sa totoso tava kilasa si gita, ura sa Nana tataru nabuna si koa hola ninae rane.

²⁴Vata rupaha gita Sa si gita koari na nada kana, ura sa Nana tataru nabuna si koa hola ninae rane.

²⁵Asa poni ni sari doduru tiṉitoṉa toadi, ura sa Nana tataru nabuna si koa hola ninae rane.