Sam 136:15-26

¹⁵Täŋpäkaŋ Isip nanik täŋo intäjukun äma ba komi ämaniye u täŋpewän ume gänaŋ äpmoŋ moreŋkuŋ.

¹⁶Täŋkaŋ ämawebeniye kome kawukiken yäŋ-yäkŋat yäpmäŋ kuŋkuk.

¹⁷U kome ätu täŋo intäjukun äma kehäromi kehäromi däpmäŋ moreŋkuk.

¹⁸Bureni, u intäjukun ämaniye wäpi biŋam ikek däpmäkgän täŋkuk.

¹⁹Amo nanik täŋo intäjukun äma wäpi Sihon u kumäŋ-kumäŋ utkuk.

²⁰Ba Basan nanik täŋo intäjukun äma wäpi Oki u kumäŋ-kumäŋ utkuk.

²¹Ude täŋkaŋ komeni kujat u ämawebeniyeta yäniŋ kireŋkuk.

²²Kome u Isrel ämawebe, epän ämaniye unita yämiŋkuk.

²³Täŋpäkaŋ iwantä ämikken nirepmirirä nibäŋ äwaräkuk nämo täŋkuk.

²⁴Nämo, u iwan keri terak nanik nimagutkuk.

²⁵Ekäni uwä imaka irit ikek päke u kudupta ketem yepmäŋ towik täyak.

²⁶Unita Kunum täŋo Anutu unita bänep täga man iwet täkäna! Imata, unitäŋo ironi u tärek-täreki nämo patkukonitä pätak, api pat yäpmäŋ ärowek.