Sam 135:9-21

⁹Vasina si evaṉi Sa sari na tinavete variva magasadi, na variva nunaladi koe Pero meke ri nana nabulu.

¹⁰Asa tugo va matei sari soku butubutu huporodi, meke sari na dia baṉara ṉiṉiradi,

¹¹sapu ari Sihoni, sa baṉara tanisa butubutu Amoraiti, meke Oqo sa baṉara pa Basani, meke sari doduru baṉara pa popoa Kenani.

¹²Poni Sa koari na tie Izireli sa dia popoa pude na dia tinago.

¹³Kei Zihova, kaqu ta tozi vurae doduru totoso sapu Agoi mo sa Tamasa, sari doduru sinage si kaqu balabala Igo si Goi.

¹⁴Kaqu lavelave hukata ni e Zihova sari Nana tie; kaqu tataru ni na toka ni Sa sari Nana nabulu.

¹⁵Sari na beku tadi na butubutu huporodi si na siliva na qolo; ta tavete mo pa limadi rina tie.

¹⁶Koadia ṉuzudi, ba lopu boka zama, koadia matadi, ba lopu boka dodogorae.

¹⁷Koa dia taliṉadi ba lopu boka avavosae, meke lopu boka siṉo si arini.

¹⁸Madi koa gua tugo arini saripu tavetedi sarini, meke sari doduru pu kalavarae koa rini.

¹⁹Ke gamu na butubutu Izireli, mi vahesia se Zihova. Ke gamu na butubutu te Eroni, mi vahesia se Zihova.

²⁰Ke gamu na butubutu te Livae, mi vahesia se Zihova. Gamu pu pamaṉa nia se Zihova, mi vahesia si Asa.

²¹Mi vahesia se Zihova pa Zaione, Koanana si Asa pa Zerusalema, mi vahesia se Zihova!