Sam 135:4-17

⁴Ura ele vizatia e Zihova se Zekopi pude Nana telena, meke sa butubutu Izireli si pude na Nana tinago.

⁵Ura gilania rau sapu nomana lavata se Zihova, meke ululu hola ni Sa sari kaiqa tamasa pule.

⁶Gua sapu qetu nia e Zihova si tavetia Sa, pa maṉauru meke pa pepeso; pa lamana, meke pa hubina sa lamana.

⁷Va vura mae i Sa sari na lei raneboṉi pa hukihukirina sa pepeso, vata evaṉi Sa sari na kapi pa raneboṉi, va vura mae ia Sa sa givusu pa keke lose vasina kopu nia Sa.

⁸Asa tugo va matei sari na koburu kenudi meke na tudia kenudi rina kurukuru ṉame pa Izipi.

⁹Vasina si evaṉi Sa sari na tinavete variva magasadi, na variva nunaladi koe Pero meke ri nana nabulu.

¹⁰Asa tugo va matei sari soku butubutu huporodi, meke sari na dia baṉara ṉiṉiradi,

¹¹sapu ari Sihoni, sa baṉara tanisa butubutu Amoraiti, meke Oqo sa baṉara pa Basani, meke sari doduru baṉara pa popoa Kenani.

¹²Poni Sa koari na tie Izireli sa dia popoa pude na dia tinago.

¹³Kei Zihova, kaqu ta tozi vurae doduru totoso sapu Agoi mo sa Tamasa, sari doduru sinage si kaqu balabala Igo si Goi.

¹⁴Kaqu lavelave hukata ni e Zihova sari Nana tie; kaqu tataru ni na toka ni Sa sari Nana nabulu.

¹⁵Sari na beku tadi na butubutu huporodi si na siliva na qolo; ta tavete mo pa limadi rina tie.

¹⁶Koadia ṉuzudi, ba lopu boka zama, koadia matadi, ba lopu boka dodogorae.

¹⁷Koa dia taliṉadi ba lopu boka avavosae, meke lopu boka siṉo si arini.