SAM 135:4-17

⁴Sike Buyambam tapata Jekop inae yawan yukut. Ngan, Isrel nana aminu Anututane donga siknga.

⁵Nata natapanu Buyambamtapa umana kopsa siknga. Sike ita anutu pupuknga ayapbike enane siknga yuak.

⁶Buyambam tapata sanga minaka takngatu yekaune gatu keune gatu yanggabam gwene ba yanggabam gwende kutakngine tasinangge natakengu ita atasinggak.

⁷Ita sopa tawikge minga kepna kepna kuupbam tasiwan aakgak. Siwan ita tasiwan yapasik siwawan sopa tanggak. Siwan gatu ita tasiwan got takngata gwatdu gwatdu puyatake kunggak.

⁸Ngan, Isip kep komune ita Isip nanatane waaknga tupan tapaapa atzipa kumbing. Siwan gatu kaapdane ngang zipa kumbing.

⁹Siwan Isip kep komune duya takngatu takngatu tasiwan king kapaat gatu tupan aminaatda kawawa kekekngana une yeuyamukut.

¹⁰Siwana ita keu kundune nana pasiwan maiking. Ngan, kingu kekeknga apaapa atzipa kumbing.

¹¹Ngan, ita Sihon tanguwan kumbut. Kingu waapa Amor nana amindane. Gatu Ok, Basan nanatane king kapa, gatu Kenan kep komune nana kingu kuupbam zipa kumbing.

¹²Siwan ita kingu waakwakgane kepna pake inane aminabamde yamukut. Wa Isrel nana unin.

¹³Buyambam tapa, asingganu aminbamda gae natapanu Anutu siakan tapa unin ngang nataing. Siwan masan aatning kaya gae waakngakan natapning.

¹⁴Dasingge, Buyambam tapata aminabam gatayaman kepi noman taknga tawake tasining. Tasiwawa kake aminu kundu iwana akwak ngana waakwakge natapa amin noman siwik. Unzingge ita inane puya aminae butaya natayamik.

¹⁵Sike katum aminda anutu pupukngana silwaat gatu gol katda pasiking. Aminu waakwakga anutu pupukngana katakngita tumuke pasipeking.

¹⁶Sike anutu pupuknga waakwau gena kaya, ngana wamu yananga dua. Siwan kaina kaya, siwan ngana sanga kananga dua.

¹⁷Siwan waakwau maaknga kaya, siwan ngana sanga natapnanga dua. Siwan nomna ganang yawan kopnanga dua.