Sam 135:1-20

¹Leemi asu ri Leeme Silok. Nemi lavasaxaruki at Leeme Silok, mina emi asu mi laasen teren.

²La nemi bok mo mi gugu ro at loogu laplavang at Leeme Silok, ni loogu at ne Moroa atnedik, mina emi asu mi laasen teren.

³Mina emi asu mi Leeme Silok atla neni i vukat. Minak pixan emi asu ri laasen teren, atla mo loklok i nunuan aleng.

⁴Neni ga soxolik kaka limixin at ne Jakop kusu tin. Neni ga soxolik ka limixin me Israel kusu ateren akmokso.

⁵Aklen i do Leeme Silok atnedik i nunuan aleng pologat, la i silok polo mo leven moroa vetpes.

⁶Neni i epovo na lok lempanga salai neni i vara i to vana at laxalibet, la de at lavatbung menemen, to xeneng at laras la to xopok tubu at lisimaramain.

⁷Neni ik lox asuusu lamanman takabu boro axa at latnese at lavatbung menemen. La ik lok lavanga i mam su boro at lamanman takabu, la i susuang asu lamanman boro at loogu lili ren.

⁸Neni ga sev amet laxamdak temes avot at limixin me Isip, la lempanga bok mi lavanuet kangkedek atdi.

⁹Neni ga lox asuusu bok lempanga lolos la sangsangu xusu ti lox asongot loorong eburu mi luvuttadi silok ua diga gugu maxopok teren.

¹⁰Neni ga sele utut buaang levenabung mixin, la ga sev amet lavaorong lolos.

¹¹Nedi ne Sion loorong at leme Amor, Ok loorong at leme Basan, la nedi lavaorong axap me Kanan.

¹²Neni ga lok ka levennep kangka atnedi na lavaorong la ga raba limixin teren min. Neni ga raba leme Israel min.

¹³Leeme Silok, limixin dinaba tong asuusu amisix i do nenu ne Moroa. La lavaola axap melemu dinabam domasu ram.

¹⁴Leeme Silok naba tupe limixin teren. Neni naba lox asuusu lebelen tuntun ti lavaanat soxolik teren.

¹⁵Limixin boro at levenabung mixin petpes dik lok levenmoroa atdi mi la siliva la gol. Luvuttadi mun mede xopok di vop di mi leventingen di.

¹⁶Di ruuna leven ngusno ketla dixo epovo ri paase. La levengkatli bok mo, ketla dixo epovo ri reven.

¹⁷Levenbaalung mo atdi, ketla dixo epovo ring tonga. La dixo epovo rinotno bok tik lok ka lamamas.

¹⁸A vara i do mo luvuttadi diga vop mo lempoovo vanga la dira nunu saga atdi, dinaba vee voovo vanga ngan mo lentaba diga vop di!

¹⁹Limixin me Israel, mina emi asu mi Leeme Silok. Nemi lavamaasa at ne Moroa, mina emi asu min.

²⁰Nemi lubung mixin me Levi, mina emi asu mi Leeme Silok, la nemi axap mo mi lotu saparav i, mina emi asu min.