Sam 119:32-50

³²Kaqu va tabe qetuqetu ni rau sari na Mua tinarae, sina kaqu va noma ia Goi sa qua ginalagilanadi rini.

³³Kei Zihova, Mu va tumatumae nau sari na ginuadi rina Mua ginarunu, meke kaqu va tabei rau si arini doduru totoso.

³⁴Mu va bakalia koa rau sa Mua tinarae meke kaqu va tabea rau si asa; kaqu kopu nia rau si asa pa doduru buloqu.

³⁵Mu kopu nau pude va tabei sari na Mua tinarae, sina koarini si vagia rau sa qinetuqetu.

³⁶Mu va okorau pude va tabei sari na Mua vina totolie, ba lopu pude koa tagotago.

³⁷Kopu nau pude qu lopu va sotoa sa qua binalabala koari na tiṉitoṉa pu lokelaedi; Mu valeana au, gua sapu ele zama nia Goi.

³⁸Mu kopu nia sa Mua vina tatara koa rau sa Mua nabulu, gua sapu ele va tatara nia Goi koarini pu va tabe Igo.

³⁹Mu harupau koari na zinama ṉoṉovala pu matagutu ni rau, nake tolavaedi sari na Mua vinilasa.

⁴⁰Okoro va tabei rau sari na Mua vina tumatumae; Mu poni nau sa tinoa vaqura, ura na toṉoto si Goi.

⁴¹Kei Zihova, Mu tataru nau pa Mua tataru nabuna, Mu va sare au koari na qua kana gua sapu ele va tatara nia Goi.

⁴²Pude qu boka olaṉi rau sarini pu zama ṉoṉovalau, sina kalavarae si rau koari na Mua Zinama.

⁴³Va boka au pude tozi vura nia sa hinokara doduru totoso, sina raṉei rau sari na Mua vinilasa.

⁴⁴Kaqu va tabei rau sari na Mua tinarae ninae rane ka rane,

⁴⁵meke kaqu koa ta rupaha si rau, sina podekia rau pude va tabei sari na Mua vina tumatumae.

⁴⁶Kaqu tozi vura ni rau sari na Mua vina totolie koari na baṉara, meke lopu kaqu tava kurekure si rau.

⁴⁷Na vagi nia qinetuqetu rau sa vina tabedi rina Mua tinarae, sina tataru ni rau si arini.

⁴⁸Pamaṉa ni na tataru ni rau sari na Mua tinarae, kaqu balabala va lohi la i rau sari na Mua ginarunu.

⁴⁹Mu lopu muliṉi nia sa Mua vina tatara koa rau sa Mua nabulu, ura raṉego rau pude poni nau gua sapu va tatara nia Goi.

⁵⁰Sa Mua vina tatara asa si va manotau pa qua totoso tasuna, sina ele va tatara nau Goi sa tinoa.