SAM 119:164-174

¹⁶⁴Gunziu gwendune tapduu katau kuut musa siwan kautdu gweaya ngangu nata gatane mama wamu noman taknga yakuyakge gaak siknga ganinggaunin.

¹⁶⁵Sike aminu gatane mama wamde take siknga nataaingu, waakwau wikake take siknga yuaing. Unzingge sanga tapatuta dua pasiwan pimaning.

¹⁶⁶Buyambam tapa, na gata gatu tapiakge ganduyuat. Sike na gika yakuyak kaknga tasinggat.

¹⁶⁷Na gatane mama wamu kuupbam atawanggat. Dasingge, na mama wamu waakwakge take siknga nataat.

¹⁶⁸Sike na gatane mama wam gatu gatane pasap wam ngang kuupbam tawanggat. Dasingge, gata natane yuyukngae kuutgan akaayak.

¹⁶⁹Buyambam tapa, gata na gatangamiakge yawa natapso. Gata natdetdeu take namuya. Unzing tupa gika gwa naniwi kekekakut taknga.

¹⁷⁰Sike maakga tumuk wamma ganiwitde tewi apsok. Tewi apan na gika atanangge tupa gwa yakuyak saak gatu tapso.

¹⁷¹Gata mama wamba kuut sikngae atnanindamukgayak. Unzingge nata umanda asinggan yatangenawit.

¹⁷²Nata kau takngatu mama wambae taiwit. Dasingge, gatane mama wamba noman gan siknga.

¹⁷³Na gatane mama wamu atawanggat. Unzingge gata gatangamunangge asinggan tandakngayo.

¹⁷⁴Buyambam tapa, natane musipmaatang gata na tapiakge kwanamu sikgak. Siwan na mama wambae natake apbaknganggat.