Salomore Gae 4:2-11

²Micsiecge i lama neŋgocne kanʒaŋ‐jeŋic bâtâcnepie opâ ruarâ wefueŋgopieŋ irec sâc qaŋqaŋ jâmbâŋ ekac. Jaŋe motecfâc‐jeŋic funʒuŋ fâri sasawa motec tâmiric moc mi jueŋgopieŋ.

³Bipicge i muc bâbâroŋ irec sâc â memasu bembeŋ, mauc jahecge ŋifec â ŋifec i rurufa maŋnao bojazaŋ iŋucne bâruŋkerâ fokac.

⁴Upege i Dawidire ficsanaŋ irec sâc, fic ira ʒika ŋic saric jaŋere wiac fuŋne fuŋne ɋetickekicne domakac.

⁵Susu jahecge i tiki noniŋ motec jajahec jahe ʒariŋ maŋnao qinʒiŋ nâhuc domakopirec irec sâc.

⁶No hae owâeha nâkumuc ʒorame ʒariŋ âsu biaŋ â hosâc âsu ririke tikio fepemu.

⁷Joroc biaŋ‐nane, go sahac hawari biaŋ jâmbâŋ, go sahac fâsâc jukomec hâcne.

⁸O ŋokac biŋe‐nane, go Lebanoŋ tiki beherâ warezemec, eme nohec mâmâc tiki mâreŋ i beherâ razeperec. Go Amana, Seniri â Herimoŋ tiki botâŋkonec biac wahazemec, laioŋ jaŋere jujuonec â lepad jaŋere tiki mâreŋkonec wahazemec.

⁹O ŋokac biŋe âgo‐nane, go maŋ bâsifuc enaretec maŋnane gorao fâfârewec, go ʒâŋe râqâc honecnutec maŋnane gorao fâfârewec, qoqonaŋgere qânâ furi sâc mocjahazi maŋnane bâsifuckewec hâcne.

¹⁰O ŋokac biŋe âgo‐nane, maŋge norao domame biaŋke‐jâmbâŋkekac, maŋge nore domame aŋacnukac i manape waiŋ opâre aŋacnuekac irec sâc sirickekac, â rurua wokemaŋ opâgere âsunezi wiac âsu biaŋ gâcne sirickekac wâc.

¹¹O ŋokac biŋe‐nane, bipicge i aŋac baŋacne, â nameŋ rurumaŋgao baŋac â susu fokac tinac ekac, erâ ŋaqigere âsu i Lebanoŋ tikire âsu irec sâc.