SALMOS 9:3-8

³Nocualancaitacahua cholojtehuase. Huetzise mictoque moixpa.

⁴Pampa ta tiquinpannextilijtoc tlacame para niitztoc xitlahuac moixpa. Titenextilijtoc para nijchijtoc tlen cuali. Timosehuijtoc ipan mosiyaj tlen yejyectzi huan titetlajtolsencahua xitlahuac.

⁵Tiquinajhuas nochi tlacame ipan nochi tlaltini tlen ax mitzneltocaj. Tiquintzontlamiltis nochi inijuanti tlen ax cuajcualme. Tiquinixpolos inintoca para nochipa.

⁶Nocualancaitacahua miquise, huan ininhuaya polihuise nochi inialtepehua. Pampa ta tiquintlamixolehuas huan ax tleno mocahuas. Axaca quinilnamiquis.

⁷Pero TOTECO tlanahuatis para nochipa. Yajaya mosehuía ipan isiyaj tlen yejyectzi nepa elhuicac huan tetlajtolsencahua. Tlen yajaya quichihua, ya nopa xitlahuac.

⁸Toteco quintlajtolsencahuas xitlahuac nochi tlaltini ipan tlaltepactli huan inintlacajhua. Yajaya quintlatzacuiltis sese inijuanti queja quinamiqui ipampa nopa tlajtlacoli tlen quichijtoque.