SALMOS 9:15-19

¹⁵Mosisinijca tlacame tlen nochi tlaltini huetzise ipan nopa tlacoyoctli tlen inijuantijya quichijque. Quitlatijtoque se tlaquetztli para ma masica sequinoc, pero inijuanti icxicuatacanise.

¹⁶TOTECO quichijtoc para nochi ma quimatica para yajaya xitlahuac tetlajtolsencahua. Yajaya quichihua para ma huetzica ipan tlaquetztli tlen ica ininma quisencajtoque.

¹⁷Nochi ax cuajcualme yase mictla. Quena, nepa ajsitij nochi tlacame tlen ax quiilnamiquij Toteco Dios.

¹⁸Pero Toteco ax quinilcahuas tlen teicneltzitzi. Yajaya nochipa quinmacas tlen quichiyaj para quiselise.

¹⁹Ximotlalana, TOTECO. Amo xiquincahuili tlacame más ma quipiyaca chicahualistli. Xiquintlajtolsencahua huan xiquintlatzacuilti nochi tlacame tlen ax mitzixmatij.