Salmos 9:1-20

¹David isquirbishan alabansa. Tayta Dios, llapan shongöpami alabayta munä. Allita rurashayquitaga llapantami willacushaj.

²Munayniyoj Tayta Diosnë gampaj cushicurmi gamta alabä. ¡Alabansacunatami cantashaj!

³Chiquimajcuna gampitaga gueshpinmi. Tunerga jinanchömi wañun.

⁴Gamga alli juez carmi dimandöta alli arriglanqui. Jamaränayquiman jamaycushcanqui llapanta jusganayquipaj.

⁵Mana rispitashojcunataga piñacushcanquimi. Mana wiyacojcunataga illgächishcanquimi. Paycunataga para-simrina gongaycärinanpämi camacächishcanqui.

⁶Chiquimajcunaga wañushanami. Quiquinwan iwalmi illgasha siudänincunapis. Gammi illgächishcanqui. Paycunapaga manami imallanpis quëdashachu yarpänanpaj.

⁷Tayta Diosmi ichanga imaycamapis ray canga. Jusgananpaj jamacunantapis camacächisha.

⁸Cada ünuntami jusganga imano cashantapis. Llapantapis iwalmi jusgangapaj.

⁹Tayta Diosga imapita ñacaycajcunatapis chapanmi. Payga llaquicuycajcunata washanmi.

¹⁰Tayta Dios, gamta rejsishoj cäga gammanmi yäracun. Gamman yäracamojtaga manami cachaycunquichu.

¹¹Sioncho mandaj caycaj Tayta Diospaj alabansata cantay. Imata rurashantapis intëru marcacunacho willacuy.

¹²Wañuchicojcunata castigäga manami gongangachu llaquicuycajcunata.

¹³Tayta Dios, chiquimajcunaga fiyupami llaquicaycächiman. ¡Cuyapaycamay ari! ¡Wañuchimänantaga ama camacächiychu!

¹⁴Chaynöpami Jerusalenman yaycunacho willacushaj alabashunayquipaj. Salbamashayquipitapis cushicushämi.

¹⁵Mana rispitashojcunaga yaganga quiquincuna uchcuta rurashallanmanmi. Togllata churashanpis quiquincunatami charenga.

¹⁶Tayta Dios gamga musyachimashcanqui allita ruraj cashayquitami. Fiyucunaga watacäcusha quiquincuna churashan togllachömi. Selah

¹⁷Fiyucunawan Tayta Diosta mana rispitajcunaga wañojcuna cashanmanmi chayanga.

¹⁸Pobricunatami ichanga imaypis mana gonganquichu. Gamman yäracamojcunataga yarparaycanquimi.

¹⁹Tayta Dios apuray ari. Ama camacächiychu fiyu runacuna alli-tucunantaga. ¡Mana rispitashojcunataga jusgay ari!

²⁰Tayta Dios chay runacunataga fiyupa mancharachiy. ¡Mana rispitashojcunaga tantiyacuchun quiquin manacajlla cashanta! Selah