SALMOS 9:1-20

¹X̱ana' Dios, dot ḻaža'a wká'n ẕena' Le'. Wzenla' benne' ka' ka nak da' ẕente da' beno'.

²Yebekzla', na' goḻkza' ka nak chio'. Goḻa' che La la'y chio' Le', nako' Dios ẕente.

³Bẕonnjgak benne' ka' bi ẕḻé'egekle' neda' chawe'. Bejchégwgake', na' wnítgekle' ḻawo' Le',

⁴dan' ẕzoa chawo'o da' chawe' da' žona'. Ži'o latje blo chio', na' cháwe'do' ẕchi'a ḻažo'o.

⁵Bdiḻo' benne' yež ka', na' bchinnjo' yo'o chegak benne' wen da' ẕinnj ka'. Bsoḻo' lagak benne' ka' to chi'ize.

⁶Wžía yi'gak benne' ka' bi ẕḻé'egekle' neda' chawe'. To chi'ize zej nbia yi' latje chegak benne' ka', na' yež chégake' ka', da' ka' bchinnjo' Le'. Nitó benne' chejsá' ḻaže'e benne' ka'.

⁷X̱anžo Dios zoakze' to chi'ize. Bkweze' latje blo chie' gan wchi'a ḻaže'e benne' ka'.

⁸Ḻo da' chawe' wchi'a ḻaže'e benne' ka' dot yežlyó, na' benne' yógo'te yež ka' ḻo da' nak ḻi ḻaže'.

⁹X̱anžo Dios nake' ka to gan chejnníta'gak chawe' benne' yache' ka', kate' žin ža che da' wžía yin' benne' wen da' ẕinnj ka'.

¹⁰Benne' ka' zej nónbi'e Le', X̱anto' Dios, wx̱én ḻáže'gake' Le', dan' bi wléj yichjo' benne' ka' žíljgake' Le', X̱anto' Dios.

¹¹Le goḻ che X̱anžon', Bennen' zoe' yež Sión. Le wzenle benne' yež ka' ka nak da' bene',

¹²dan' žejsá' ḻaže'e chegak benne' ka' ẕzáka'gake', na' yezi'e wzón che benne' wetw benách ka'. Bi gaḻ ḻaže'e da' žḻižgak benne' yache' ka' Le'.

¹³Beyache' ḻaže'l neda', X̱ana' Dios. Bwia da' ẕzaka'a ḻo na'gak benne' ka' bi ẕḻé'egekle' neda' chawe'. Le' bekó'o neda' ḻo na' yeḻa' got

¹⁴nich wzenla' benne' ka' da' ẕka'n ẕena' Le' gan ẕdóbgake' ḻo yež Sión, na' yebéḻe'ela' dan' besló' neda'.

¹⁵Chejchazgak benne' yež ka' ḻo yežw da' bché'ngake'. Chejcházgake' ḻo do yeḻj da' bdíx̱jgake'.

¹⁶X̱anžo Dios bḻoe'ele' kan ẕchi'a ḻaže'e, dan' wbága'gak ẕia benne' ka' bi zej nake' chawe' ni'a che da' béngakkze'.

¹⁷Benne' bi zej nake' chawe' ka' cházgake' ḻo yi' gabíl, yógo'te benne' ka' žaḻ ḻáže'gake' X̱anžo Dios.

¹⁸Kege to chi'ize gaḻ ḻaže' Dios benne' yache' ka', na' kege to chi'ize nitle da' žx̱en ḻáže'gake'.

¹⁹Wzó ža', X̱ana' Dios. Bi go'o latje benne' ka' wká'n ẕen kwíngake'. Ḻa'gak benne' yež ka' ḻawo' Le' nich wchi'a ḻažo'o ḻégake'.

²⁰X̱ana' Dios, ben ga žébegak benne' ka' Le'. Yeyónbia'gak benne' yež ka' zej nake' benachze.