Salmos 97:3-11

³Paypa ñaupantaga nina rataycajmi aywan. Chay ninami payta chiquejcunataga rupar ushacurcun.

⁴Illguyninpis intërutami cay munduta achicyan. Chayta ricar cay pachaga fiyupami sicsicyan.

⁵Cay pachapa duyñonga Tayta Diosmi. Paypa ñaupanchöga jircacunapis wacpa caypami gotucäcun sëra chulluycajnöraj.

⁶Tayta Dios allita ruraj cashanta syëlucunami willacun. May-chaychöpis tiyajcunanami rican alli cashanta.

⁷Pengay-tucushami canga ïdulucunata adurajcunaga. Ïduluncunallawanmi paycunaga alli-tucusha. Llapan dioscunapis Tayta Diostaga rispitanmi.

⁸Tayta Dios, alli jusgashayquipitami Judá particho caycaj siudäcunawan Sionga fiyupa cushicun.

⁹Janaj pachacho caycaj Tayta Dios, gamga caycanqui intëru allpa jananpa, waquin dioscunapitaga mas janajchöraj.

¹⁰Tayta Diosta cuyajcunaga mana alli runacunapita witicuy. Payga wiyacojcunata wañuypitapis chapanmi. Fiyu runacunapitapis salbanmi.

¹¹Allita ruraj runataga Tayta Diosmi achquipanga. Tayta Dios munashanno ruraj runacunapäpis cushicuymi canga.