Salmos 94:4-12

⁴¿Imaycamaraj paycunaga alli-tucurcaycanga? ¿Imaycamaraj alabacurcaycanga?

⁵Tayta Dios, paycunami acrashayqui runacunata illgächin. Sirbishojniquicunatapis pengayman churan.

⁶Biyüdacunata, wañuchin. Wacchacunata yarpaypa wañuchin. Juc-lä runacunatana ñacachin.

⁷Paycunaga nin: «Jacob rispitashan Diosga manami cuentata gocunchu. Manami ricamanchïpischu.»

⁸Mana tantiyacoj upa runacuna, ¿imanirtaj mana tantiyacunquichu? ¿Imaytaj tantiyacunquicuna?

⁹Tayta Diosmi rurasha ñawinchïta rinrinchïtapis. Chauraga ¿imanirtaj mana wiyanmanchu, mana ricanmanchu?

¹⁰Nasyuncunacho tiyajcunatapis alli rurananpaj piñacuycarga mana wiyacojcunataga ¿manachuraj castiganga? ¿Imanirtaj mana musyanmanchu runatapis yachacunanpaj tantiyachëga?

¹¹Tayta Diosga musyanmi runa manacajcunallata yarpashancunata.

¹²Tayta Dios, cushishami cawanga imano cawananpäpis piñacushayqui runaga. Cushishami cawanga Layniquita yachachishayqui runaga.