SALMOS 94:3-23

³TOTECO, ¿hasta quema tlamis tlatlanise huan mopaquilismacase nopa tlacame tlen axaca quitlepanitaj?

⁴¿Hasta quema tlamis tetlaijilhuise huan mohueyimatise nopa tlajtlacolchijca tlacame?

⁵TOTECO, inijuanti tlahuel quintlaijiyohuiltíaj huan quincuesolmacaj motlacajhua tlen tiquinicnelía.

⁶Inijuanti quinmictíaj cahual toahuihua tlen ehuani ipan sequinoc altepetini huan tlen icnotzitzi.

⁷Huan quiijtohuaj para ta, TOTECO, ax tiquita, niyon ax timomaca cuenta. Queja nopa quiijtohuaj tlen ta tlen tiiTeco tohuejcapan tata Jacob.

⁸Imojuanti tlen inhuihuitique ipan ni tlacame, xijmachilica. ¿Hasta quema inquitequihuise imotlalnamiquilis para intlamachilise?

⁹Toteco quisencajqui tonacashua, huajca ¿inmoilhuíaj para ax quicaquis tlen inquiijtohuaj? Yajaya quichijchijqui toixtiyol, huan ¿inmoilhuíaj para ax quiitas tlen inquichihuaj?

¹⁰Yajaya quintlatzacuiltía tlacame ipan nochi tlaltini, ¿inmoilhuíaj ax inmechtlatzacuiltis nojquiya? Yajaya quimati nochi tlen pano, huan ¿inmoilhuíaj ax quimati tlachque inquichihuaj?

¹¹TOTECO quiixmati inintlalnamiquilis tlacame huan quimati para san moilhuíaj tlamantli tlen ax cuali.

¹²Pero cuali ininpanti nopa tlacame tlen ta, TOTECO, tiquintlatzacuiltis para tiquintlalnamictis. Ya nopa quinpalehuía para quitoquilise moojhui, huan para monejnemiltise xitlahuac ipan motlanahuatilhua.

¹³Huan para itztose ica paquilistli quema ajsis nopa tonali tlen fiero. Pero nopa tlacame tlen ax quitlepanitaj TOTECO mochihuilíaj se tlacoyoctli para ipan momasiltise huan motzontlamiltise.

¹⁴Pampa TOTECO ax quintlahuelcahuas itlacajhua pampa inijuanti iaxcahua.

¹⁵Se tonal Toteco tetlajtolsencahuas xitlahuac, huan nochi tlen itztoque ica ininyolis xitlahuac, inijuanti paquise miyac.

¹⁶¿Ajqueya nechmanahuis ininmaco nopa mosisinijca tlacame? ¿Ajqueya nechmocuitlahuis tlen nopa tlaixpanoca tlacame?

¹⁷Intla Toteco ax nechpalehuijtosquía, huajca noyoltzi ya eltosquía campa tlatzitzicatoc pampa ya nimictosquía.

¹⁸Na nitzajtzic huan niquijto: “TOTECO, moxitlanía noicxihua.” Huan yajaya nechtlasojtlac huan nechmaquixti.

¹⁹NoTeco, quema san nimoyolilhuía tlen miyac cuesoli huan san ya nopa nijmati, ta tinechyoltlalía. Tinechchihuilía ma nimotemachi ipan ta huan tinechmaca paquilistli.

²⁰Se tlanahuatijquetl tlen ax quichihua tlen xitlahuac, ax tijcahuas para mosentilis ica ta. Niyon ax itztoc mohuaya tlen quichihua se tlanahuatili tlen ax xitlahuac.

²¹Pero tlanahuatiani queja nopa mosentilíaj huan mocamahuíaj para quejatza quimictise se tlen ax tleno quichijtoc, o se tlen cuali monejnemiltía.

²²Pero TOTECO yajaya nechmocuitlahuía pampa tlahuel miyac chicahualistli quipiya. Ipan noTeco Dios nimomaijtohua huan ax tleno huelis nechajsis pampa yajaya nechmanahuía.

²³Huan Toteco Dios quichijtoc para ma huetzi ininpani nopa mosisinijca tlacame nochi nopa tlamantli tlen ax cuali quichijtoque. Yajaya quintzontlamiltis senquistoc queja quisencajtoyaj quinchihuilise sequinoc. Quena, TOTECO toDios yajaya quintzontlamiltis.