SALMOS 94:2-18

²Ẕchi'a ḻažo'o Le' da' žongak yógo'te benne' ka'. Wzó ža', bsaka' benne' ka' kan žaḻa' gak chégake', benne' ka' ẕka'n ẕen kwíngake'.

³X̱ana' Dios, ¿to chi'ize gongak benne' wen da' ẕinnj ka' ki? ¿To chi'ize yebégekle benne' ẕbej yíchjgake' Le'?

⁴¿To chi'ize wká'n ẕen kwíngake', na' nne zí'gake'? ¿To chi'ize wká'n ẕen kwingak benne' ka' žebéj yíchjgake' Le'?

⁵Benne' ki ẕžia yí'gake' benne' chio' ka', X̱ana' Dios na' žsaka' zí'gake' benne' ka' wžekzo' Le'.

⁶Žótgake' no'le wzebe ka', na' benne' zi'to' ka', na' žóngake' ga gatgak bi' wzebe ka'.

⁷Ẕnnágake': “Bi be ẕḻe'el Dios, X̱angak benne' ka', dan' Dios chegak benne' Israel ka' bi ži'e wnné yoe chégake'.”

⁸Le chejní'il, ḻe'e, benne' ḻaẕdo' zide ka', ḻe'e, benne' nat ḻaže' ka'. ¿To chi'ize bi chejní'ilele?

⁹Dios bene' nagžo. ¿Bi ženle' da' ẕnnale? Dios bene' yej ḻawžo. ¿Bi ẕḻe'ele' da' žonle?

¹⁰Dios žsaka' zi'kze' benne' yež ka'. ¿Bi tiḻe' ḻe'e? Dios nake' Bennen' ẕzejni'ile' benách ka'. ¿Bi gákbe'ele' da' yo'o yichj ḻáẕdo'le?

¹¹X̱anžo Dios nnezkzle' da' yo'o yichj ḻáẕdo'gak yógo'te benách. Nnezle' zej naken da' yaḻze.

¹²X̱ana' Dios, ba nez ẕen naken che bennen' ẕzejni'ilo' Le', na' žsedlo' ḻe' ka nak da' bchi'lo' neto'.

¹³Ga'n bennen' chawe' kate' za' ža gak bi da' sake'e, na' ža na' gáche'gak benne' wen da' ẕinnj ka' yežw ba.

¹⁴Batkle kwej yichj X̱anžo Dios benne' chie' ka', na' bi wsán ḻaže'e benne' ka' ba wžekze' Ḻe',

¹⁵san gone' ga wchi'a ḻáže'gak benne' ka' ḻo da' naken chawe', na' yógo'te benne' ḻi ḻaže' ka' si' ḻo ná'gaken'.

¹⁶¿Noẕkze benne' gákḻene' neda' nich tíḻ-ḻenžo benne' wen da' ẕinnj ka'? ¿Noẕkze benne' gónḻene' neda' tẕen nich wžía yi'žo benne' wen da' ẕinnj ka'?

¹⁷Chela' bi gokḻen X̱anžon' neda', ba bejgacha'a yežw ba.

¹⁸Kate' wnnía': zoa' chejchégoa'a, na' Le', X̱ana' Dios, ḻo yeḻa' ži'i ḻaže' chio' gókḻeno' neda'.