SALMOS 91:3-14

³Pampa san yaya hueli mitzmanahuis tlen nochi tlaquetztli catli sequinoc quintlatise para mitzmasiltise. Mitzmocuitlahuis para amo mitzajsis nopa cocolistli catli tetzontlamiltía.

⁴Quen se tenampillo quintlatía ipilconehua ieltlapaltzala, Toteco quej nopa nojquiya mitzmocuitlahuía. Temachtli mitzchihuilis nochi catli mitztlajtolcahuilijtoc, pampa timotemachijtoc ipan ya para mitzmanahuis.

⁵Huajca ama ayacmo ximajmahui ica tlayohua, niyon amo xiquimacasi catli hueli panos ipan tonaya.

⁶Amo xiquimacasi nopa tlaijiyohuilistli catli huala ipan tzintlayohuilotl, niyon nopa miquilistli catli ajsi ica tlajcotona.

⁷Masque monechca miquise mil o majtlactli mil masehualme, pero ta amo mitzajsis.

⁸Ica moixteyol tiquitas quenicatza quiselise tlatzacuiltili nopa tlaixpanoca tlacame.

⁹Sintla timotemachijtoc ipan TOTECO para mitzmocuitlahuis, huan timochiya ipan Toteco Catli Más Hueyi para mitzpalehuis,

¹⁰huajca amo mitzajsis niyon se tlamantli catli amo cuali, niyon amo quiajsis mochaj.

¹¹Pampa Toteco quintitlanis itequihuajcahua para ma mitzmocuitlahuica, huan mitzmocuitlahuijtinemise campa hueli ta tiyas.

¹²Huan itequihuajcahua mitztlananase ica ininmax para amo timotepotlamis ipan ojtli.

¹³Niyon amo timajmahuis masque tijquetzas moicxi ipan se león o se cohuatl catli temictía. Quena, amo tleno mopantis masque timoquejquetzas ininpani.

¹⁴Pampa Toteco Dios quiijtohua: “Na nijmanahuis pampa nechicnelía. Nijhueyitlalis pampa motemachía ipan na.