SALMOS 90:1-8

¹Toteco, ta nochipa titechmocuitlahuijtinentoc, hasta tlen ipejya nochi xihuitl huan para nochi tonali.

²Hasta quema aya tiquinchijchihuayaya tepetini huan tlaltepactli, ta ipa tiitztoc. Pampa ta, tiToteco Dios, ax quema tijpixqui mopejya, huan ax quema tijpiyas motlamiya.

³Ta tijchihua para nochi tlacame ma mocuepaca tlali. Quena, ticamati huan tiquijtohua: “Ximiquica intlacame.”

⁴Pampa mil xihuitl ta tiquita queja se tonal tlen panoc yalohua, o queja elisquía se eyi hora quema se tlamocuitlahuiyaya tlayohua.

⁵Toyolis motlaloti queja atl tlen hualtemo chicahuac ipan se atlajtli. Huan ica se tlalochtli tiixpolijtehuaj queja se temictli. Nojquiya tiitztoque queja se xihui cuahuitl.

⁶Ica ijnaloc moscaltía huan cahuani, huan ica tiotlac quitzontequij huan huaqui.

⁷Pampa ica mohueyi cualancayo titechtlaijiyohuiltía huan titechtzontlamiltía.

⁸Totlajtlacolhua huan totlaixpanolhua tlanempa nestoc moixpa.