Text copied!
CopyCompare
Icamanal toteco; Santa Bíblia - SALMOS - SALMOS 89

SALMOS 89:9-52

Help us?
Click on verse(s) to share them!
9San ta tihueli tijnahuatía nopa hueyi atl quema mosisinía huan mocoxonía chicahuac. Tijtlacahualtía huan quichihua catli tiquilhuía.
10Ta tijtzontlamilti nopa catli temajmatiyaya ipan hueyi atl. Ica mohueyi chicahualis tiquinsemanqui mocualancaitacahua.
11Ta moaxca ilhuicactli, tlaltipactli huan nochi catli onca, pampa nochi tijchijchijqui ta.
12Tijchijchijqui nopa norte huan sur. Nopa tepeme Tabor huan Hermón paquij pampa ta tiquinchijchijqui.
13Moajcol tlahuel quipiya chicahualistli. Huan monejmac quipiya tetili huan miyac yajatili para tlatlanis.
14Motlanahuatilis motlatzquilijtoc ipan ome tlamantli: Titetlajtolsencahua xitlahuac huan tijchihua catli cuali. Titeicnelía huan tiquijtohua catli melahuac.
15Nelía paquij nopa masehualme catli quicaquij nopa tlapitzali catli quinnotza ma mitzhueyichihuaca, TOTECO. Inijuanti nemise nelía monechca huan ta tiquintlahuilis.
16Semilhuitl mopaquilismacase ipan ta pampa tlahuel tihueyi huan tixitlahuac.
17Pampa san ta tijpiya mohueyitilis huan tiquinfuerzajmaca. Timasehualme tijpiyaj chicahualistli pampa ta techpalehuía.
18Quena, Toteco Dios, ta catli titlatzejtzeloltic techmocuitlahuía tojuanti ipan tlali Israel. Ta titotlanahuatijca.
19Ipan se tlanextili tijcamanalhui motlatzejtzeloltijca tlajtol pannextijca huan tiquilhui: “Tlen nochi masehualme nijtlapejpenijtoc se yejyectzi telpocatl catli tlahuel motemaca, huan nijtequitlali ma eli tlanahuatijquetl para na.
20Quena, nijpantijtoc notequipanojca David huan nicaltijtoc ica nopa aceite catli ica niteiyocatlalía para ma nechtequipanoca.
21Nijchihuas ma eli temachtli huan nijmacas chicahualistli.
22Amo quiechcapantlalise icualancaitacahua, niyon amo quitlanise tlaixpanoca masehualme.
23Iixpa niquintzontlamiltis icualancaitacahua huan nochi catli quicualancaitaj.
24Na catli nitemachtli nijmocuitlahuis huan nijtiochihuas tlatoctzitzi, huan tlahuel miyac niquicnelis. Ica na notlapalehuil yaya elis tlahuel hueyi.
25Na nijchihuas para itlanahuatilis pehuas campa hueyatl Eufrates, huan tlamis hasta campa hueyi atl catli itoca Mediterráneo.
26Huan yaya nechtzajtzilis huan nechilhuis: ‘¡Ta tinoTata, ta tinoTeco Dios! Ta catli techmaquixtía huan techtlatía para amo tleno nechajsis.’
27Na niquitas nopa tlanahuatijquetl quen noachtihui cone. Nijchihuas para yaya ma eli nopa tlanahuatijquetl catli más hueyi ipan nochi tlaltipactli.
28Niquicnelis para nochipa huan para nochipa nijchihuilis catli cuali. Huan nopa camanal sencahuali catli nijchijtoc ihuaya, amo quema tlamis.
29Na nijtequimacas se iixhui para ma tlanahuatis campa yaya tlanahuatiyaya. Itlanahuatilis huejcahuas para nochipa quen huejcahuas ilhuicactli.
30Pero sintla iconehua quitlahuelcahuase noley huan amo monejnemiltise quen quiijtohua notlamachtil,
31o sintla quiixpanose catli niquinnahuatijtoc ma quichihuaca ipan ininnemilis huan amo quintlepanitase notlanahuatilhua,
32huajca niquintlatzacuiltis pampa ya nopa quinextis para amo nechneltocatoque huan tlajtlacolchihuaj.
33Pero amo nijcahuas niquinicnelis, niyon amo nijtlamiltis nopa camanali catli nijchijtoc ininhuaya.
34Amo niquelcahuas catli ica nimocajtoc David huan amo nijpatlas nocamanal.
35Pampa na nitlatestigojquetzqui para nijchihuilis David nochi catli nijtlajtolcahuilijtoc. Huan na niDios catli nitlatzejtzeloltic amo hueli niistlacatis.
36Iixhui mosehuis huan tlanahuatis para nochipa campa ya mosehui. Itlanahuatilis huejcahuas san quen imiyaca tonali tlahuijtos tonati.
37Quena, itlanahuatilis tlahuel huejcahuas quen huejcahuas metztli, o quen huejcahuas nochi catli eltoc ipan ilhuicac catli eltoque quen notestigos.” Quena, quej nopa tiquijto, Toteco.
38¿Huajca para tlen techtlahuelcahua huan techhuejcamajcahua? ¿Para tlen tlahuel ticualani ica yaya catli tijtlapejpenijtoc para elis tlanahuatijquetl?
39¿Atlac tijsosolojtoc nopa camanali catli tijchijqui ihuaya? Pampa eltoc quen tijtlahuiso icorona hasta tlalchi.
40Tijcahuili tocualancaitacahua ma quihuelonica nopa tepamitl catli yahualtic quitzacuayaya toaltepe. Huan quitlamisosolojque nopa calme catli huejcapantique campa timomanahuiyayaj.
41Nochi catli panoj nopona quiichtequij catli inijuanti quinequij. Huan nopa masehualme catli itztoque tonechca san techhuetzquilíaj.
42Tiquinfuerzajmacatoc tocualancaitacahua, huan tiquinchijtoc ma paquica pampa techtlantoque.
43Tijquixtili itlatequiyo tomachete catli ica titlahuilanayayaj, huan amo tijnejqui techpalehuis para ma titlatlanica.
44Techquixtili noyejyejca huan tijtlahuisojtoc hasta tlalchi notlanahuatilis.
45Techchijtoc ma nitlatochuehuejtiya huan techpinahualtijtoc iniixpa nochi masehualme.
46TOTECO, ¿hasta quema tlamis ticualantos? ¿Hasta quema noja timotlatijtos tlen tojuanti? ¿Atlac para nochipa mohueyi cualancayo eltos quen tlitl?
47¡Toteco, xiquelnamiqui para tonemilis amo huejcahuas ipan ni tlaltipactli! ¿Atlac amo tleno ipati nopa nemilistli catli tiquinmacatoc nochi masehualme?
48Niyon se masehuali amo huelis itztos para nochipa. ¡Nochi miquise! ¿Ajqueya huelis quimanahuis inemilis imaco miquilistli?
49NoTeco Dios, ¿canque eltoc motlaicnelilis tlen huejcaya? ¿Para tlen ayacmo tijpiya hueyi moyolo ica tojuanti? Ta tiToteco catli titemachtli, tijtlajtolcahuili David para melahuac amo quema techtlahuelcahuas.
50TOTECO, xijtlachili quenicatza nochi masehualme techcualancaitaj tojuanti timomasehualhua.
51Mocualancaitacahua quipinahualtíaj yaya catli tijtlapejpenijtoc para elis tlanahuatijquetl.
52Ma tijpaquilismacaca TOTECO para nochipa. Quej nopa ma eli.

Read SALMOS 89SALMOS 89
Compare SALMOS 89:9-52SALMOS 89:9-52