Salmos 89:7-24

⁷Dule-gwage-swilidikmalad onmakbukwale, Bab-Dummad-dobee itodamalad. Bab-Dummad na e-ebiris-bukmaladba bur-dummadid, bur-dutusurbalid.

⁸Bab-Dummad-Bela-Gangued-Nika-Maid, ¿doa beyob gue? Dule beyobid sate. Bab-Jehová, bedi gandikidid, bedi innikidaedid.

⁹Bab-Dummad, demar-dagumakmaid be bargaed. Demar-dummagan-arwemaid be obogileged.

¹⁰Be ibdula-dummad-Rahabʼye-nugad, maataa be oburgwisad. Bela-bela be gangued-nikadba be-isdarmaladgi be nakwisad.

¹¹Bab-Jehová, nibneg begadid, napneg begadid. Be we-napneg-naidi obinnisad, bela egi-ibmar-bukwadi be urbisad.

¹²Be dad-nakwed-argan-sapiledsik-yar-bukwad obinnisad, dad-nakwed-argan-nuedsik-yar-bukwad be obinnisbalid. Tabor-yar weligwar be-nugga namaked, Hermón-yar weligwar be-nugga namaked.

¹³Bab-Jehová, bela-bela be gangued-nikadba be ibmar-dummagan imaked. Be-argan-nued be onakwed, ar be emargi obichad.

¹⁴Bab-Jehová, igar-maidba, igar-innikigwadba be negsemaid. Dule-wiledaked be oyoged, igar-innikigwad be oyobalid.

¹⁵Bab-Jehová, dulemar weligwaledgi-be-nug-odummomaladgi, nued binsalesad. Wemar be-sogedba nanadimalad.

¹⁶Be-nuggi wergudii osedoddamalad, be-igar-innikii-imakedgi wergudimalad.

¹⁷Ar be we-dulemar-e-gangued-e-yeerdakleged gued. Nued be anmargi-binsaedbali, be anmar-gangued ogannoged.

¹⁸Be, Bab-Jehová, be anmar-sigu-abgaedga gued. Be, Israel-dulemar-e-reyd, Gwage-Isligwaledid.

¹⁹Ibagwengine, be-dula-gwage-swilidikmaladga be negburgan oyosad, aba ega be sunmaksad. Be-dulamar-bega-nued-nanadimaladga be sogsagusad: “An dule-wargwen-buled bendaksad. Dulemar-abargi dule-bur-emargi-obindiid-e-nug an odummosad.

²⁰An-mai-David an sunonikid, reyga-guega an-gwallu-wawad, an e-nonogi eosad.

²¹An bendakdii guoed. An-ganguedgine ogannodii an imakoed.

²²E-isdarmalad egi nakosulid, dule-isganamar sabsur-imakosulid.

²³An e-isdarmalad obelogoed, dule-e-isdardakdimaladi an osulogoed.

²⁴An degisadegu David-sabgudii guoed. An-nuggine e-gangued dungumai guoed.