SALMOS 89:3-22

³Ta tiquijtojtoc para tijchijqui se tlajtolsencahuali ica motlatequipanojca David tlen tijtlapejpenijtoc. Titlatestigojquetzqui tlen tijchihuilis.

⁴Tiquilhui para se iixhui mosehuis ipan isiyaj campa yajaya tlanahuatía, huan nopano tlanahuatis para nochipa.

⁵TOTECO, tlen itztoque ipan elhuicac mitzpaquilismacaj ipampa nochi nopa chicahualnescayotl tlen tijchihua. Huan miyac millones moelhuicac ejcahua mitzhueyimatise pampa titemachtli.

⁶Pampa ipan nochi elhuicac axaca seyoc tlen san se queja ta, Toteco Dios. Huan niyon se elhuicac ejquetl ax quipiya chicahualistli queja tlen tijpiya ta, Toteco.

⁷Toteco Dios, ta nelía tihueyi huan titemajmati. Nochi motlatzejtzeloltijca elhuicac ejcahua mitztlepanitaj. Quena, nochi tlen mitzyahualojtoque, majmahuij quema moquetzaj moixpa.

⁸TOTECO, ta tiDios Tlen Tijpiya Nochi Chicahualistli, ¿ajqueya seyoc tlahuel quipiya chicahualistli queja ta? ¡Axaca seyoc! San ta TOTECO tlahuel tijpiya chicahualistli. San ta nelía titemachtli.

⁹San ta tihueli tijnahuatía nopa hueyi atl quema mosisinía huan mocoxonía chicahuac. Tijtlacahualtía huan quichihua tlen tiquilhuía.

¹⁰Ta tijtzontlamilti nopa tlen temajmatiyaya ipan hueyi atl. Ica mohueyi chicahualis tiquinsemanqui mocualancaitacahua.

¹¹Ta moaxca elhuicactli, tlaltepactli huan nochi tlen onca, pampa nochi tijchijchijqui ta.

¹²Tijchijchijqui nopa norte huan sur. Nopa tepetini Tabor huan Hermón paquij pampa ta tiquinchijchijqui.

¹³Moajcol tlahuel quipiya chicahualistli. Huan monejmatl quipiya tetili huan miyac yajatili para tlatlanis.

¹⁴Motlanahuatilis motlatzquilijtoc ipan ome tlamantli: Titetlajtolsencahua xitlahuac huan tijchihua tlen cuali. Titeicnelía huan tiquijtohua tlen melahuac.

¹⁵Nelía paquij nopa tlacame tlen quicaquij nopa tlapistli tlen quinnotza ma mitzhueyichihuaca, TOTECO. Inijuanti nemise nelía monechca huan ta tiquintlahuilis.

¹⁶Mojmostla mopaquilismacase ipan ta pampa tlahuel tihueyi huan tixitlahuac.

¹⁷Pampa san ta tijpiya mohueyitilis huan tiquinfuerzajmaca. Titlacame tijpiyaj chicahualistli pampa ta titechpalehuía.

¹⁸Quena, Toteco Dios, ta tlen titlatzejtzeloltic titechmocuitlahuía tojuanti ipan tlali Israel. Ta titotlanahuatijca.

¹⁹Ipan se tlanextili tijcamahui motlatzejtzeloltijca tiocamanalojca huan tiquilhui: “Tlen nochi tlacame nijtlapejpenijtoc se yejyectzi telpocatl tlen tlahuel mosemaca, huan nijtequitlali ma eli tlanahuatijquetl para na.

²⁰Quena, nijpantijtoc notlatequipanojca David huan nicaltijtoc ica nopa aceite tlen ica niteiyocatlalía para ma nechtequipanoca.

²¹Nijchihuas ma eli temachtli huan nijmacas chicahualistli.

²²Ax quiicnotlalise icualancaitacahua, niyon ax quitlanise tlaixpanoca tlacame.