Salmos 89:28-42

²⁸Tu chí'izqueze nuzúa' chee̱' xel-la' zri'i lazre' chia', na' ca naca xel-la' wezría chia' gaca líqueze na nen le̱'.

²⁹Guna' tu cházqueze zri'ine zre sue̱', na' xelenná be'e̱ lu waláz chee̱' dxácate̱ ne zua xabáa.

³⁰Che xulusán zri'ine zre sua David da nadxixruj be'a, ne che quebe xelune̱' ca da nuchi'a chee̱',

³¹ne che xelecuase̱' lu da dxenná be'a, ne che quebe xelune̱' ca da dxapa' le̱',

³²na' gu'a le̱' zrise lawe' da dxeledábague̱' neda', ne quina' le̱' xide lawe' da dxelune̱' da cale̱la.

³³Quebe gusana' ca nazrí'ida' David, ne quebe gusana' gaca' li lazre' nen le̱',

³⁴ne quebe gal-la lazra' xel-la' wezría da nuna', ne quebe guchá'a ca da ba gunnía'.

³⁵Tu lásaze bzetaj cuina' guche̱be lazra', na' cabata' gun lazra' chee̱ David,

³⁶gunnia': Tu cházqueze zri'ine zre sue̱', na' xelenná be'e̱ lu waláz chee̱' lawa' neda' dxácate̱ ne zua gubizra.

³⁷Xel-la' dxenná bea chee̱' tu sua chúchuzqueze na ca zua beu' zran xabáa. Tu sua chúchuzqueze na dxácate̱ ne zua xabáa.

³⁸Lue', Dios, guleaj xíchaju', ne bzu' chalá'ala bénnea' guca'u, ne dxezrá'le̱'u le̱'.

³⁹Nuzú' chalá'ala xel-la' wezría bé̱nle̱nu' David, we̱n zrin chiu', ne nucá'ana dítaju' xel-la' dxenná bea chee̱'.

⁴⁰Nuxrínnaju' ze'e da naxechaj na xe̱zre zréntau' chee̱', ne nuzría xi'u ca naca lataj wal-la chee̱' chee̱ wedil-la.

⁴¹Xúgute̱ bénneache, benne' dxeledaze ga na' dxelebane̱' chee̱ da zaj de̱ chee̱', na' benne' xe̱zre walízr chee̱' dxelún le̱' chee̱'.

⁴²Ba be̱nu' bedxúaj chawe' benne' guledábague̱' Le̱', na' dxelebéle̱'e̱ne̱'.